E partisipantenan ta trein e koreografia pa riba e boto, un homenahe na tur e víktimanan di e atentado na Orlando riba un klup di homoseksual –potrèt: John Samson
AMSTERDAM – E boto di OCaN mayan tòg lo nabegá den EuroPride na Amsterdam. Ounke tabatin diferente rechaso di supsidio, na último momentu nan a logra pa via spònser i e partisipantenan mes, rekoudá e plaka nesesario.
Bon mirá e boto e aña aki mester a bira un upgrade di e boto di Reino ku aña pasá a nabegá den Gay Pride. E aña aki lo el a nabegá no solamente ku e partinan karibense di reino, sino tambe ku otro isla karibense ku tin un laso ku Union Oropeo. Pero e plan aki a kambia awor pasobra na final no a bini plaka for di Brussel. Pa por haña plaka tòg e boto a bira internashonal.
No a haña plaka di Brussel
Aña pasá Aruba tabata presidente di OCTA, un koperashon di isla karibense ku tin un laso ku Union Oropeo. P’esei Aruba a bini ku e idea pa un boto spesial pa e islanan karibense. Brussel a haña e kos un bon plan, pero tòg no a bini supsidio. Segun e organisadónan esei ta falta di e ‘burokrasia enorme’ na e instanshanan oropeo.
I pa nan desapunto grandi, OCaN no por a konta ku e ministerionan hulandes tampoko. “Na e ministerionan no tabatin bùdjèt òf nan no ker a krea un presedente”, Angelo Tromp di Aruba, kende for di prinsipio a empeña pa un boto karibense, ta konta.
‘Boto Orlando’
Djasabra mas o ménos 110 hende ta bai ku e boto, prinsipalmente di desendensia karibense. E boto di OCaN serka públiko di Amsterdam a haña e beinam ‘Boto Orlando’, pa motibu di e homenahe ku e partisipantenan lo trese durante e biahe di e boto na tur víktima di e atentado na yüni den un gayclub na Estádos Unídos.
Outor John Samson