Serka esnan di mas hóben Spalman ta kuminsá ku un ritmo kaminda e alumnonan ta djòin e tokamentu un pa un – potrèt: Elisa Koek
WILLEMSTAD – Desena di hóben ta kore den plenchi di Alablancaschool: hungando futbòl, kantando rèp òf bulando ariba abou nan ta kore bai tur banda. Ta parse hopi trabou pa laga e grupo aki toka ritmonan huntu ku otro e siguiente ora, sin papia nada nada.
Pero nan ta logra. Via World Music Box, Mathijs Spaltman ta pone e muchanan keda ketu ketu den algun minüt. Esta pa loke ta nan boka, pasobra ku nan mannan nan ta saka basta zonido for di e kahitanan di muzik.
A lanta World Music Music na 2003 i e ta keda na Sur-Afrika, Sur-Amerika, Oropa i na Kòrsou. E meta di e workshop ta pa hasi muzik sin instrukshon, palabra òf instrukshon.
Enseñansa spesial
Alablanca School na Barber ta un skol pa enseñansa LOM, ZMLK i MLK. Hopi bia e muchanan tin problema ku siñamentu òf komportashon i den enseñansa regular no tin lugá pa nan. Espesialmente e departamento di ZMLK tin un enfoke hopi práktiko. “Nos ta trata mas tantu posibel pa laga e alumnonan hasi kos nan mes, pasobra hopi bia nan ta kere ku nan no por mashá. Pa medio di laga nan siña kos na un manera mas práktiko, nan ta ripará ku nan por mas ku nan mes a kere”, dosente Gisela Haynes-Koenraad ta bisa.
Spaltman semanalmente ta duna un workshop na e skol, i ounke e muchanan no por konsentrá largu, tòg durante di e workshopnan nan ta logra konsentrá. “Ta mas ku djis toka un ratu”, Haynes-Koenraad ta bisa. “Bo ta ripará e efekto i ku e alumnonan ta mas trankil despues.
Agresividat
Spaltman tin mas ku sinku aña ta tene e workshopnan i el a pasa den basta kos. “Si, mi a yega di eksperensiá ku nan a mandá mi ku un kahita”, e ta konta,. “Mi ta topa ku agresividat di mucha ku no ta bai dilanti ma na final ta bai bon tòg.” Mayoria bia e sa delantá kiko e por ferwagt i e ta prepará pa mal komportashon. “Den un prizòn mi por ferwagt otro kondukta ku durante un workshop pa un kompania òf na un skol. Mi ta adaptá mi programa i tin bia mi ta laga tur kos bai i mi ta laga e alumnonan djis bati tur ku tin riba e kahitanan.”
E ta konta ku na AlablancaSchool tambe mester a kustumá. Durante e promé workshop e konsentrashon a dura maksimalmente dies minüt. “E kos a bai un pia un pia ma despues di algun luna nan a wanta henter un workshop largu.” Hopi bia Spaltman ta fókùs riba nan konfiansa i ta purba yama nan afó. “Por ehèmpel mi ta pone e alumno di mas ketu di klas den mei mei di e grupo. Mi ta lag’é traha un ritmo ku otro ta antisipá ariba. E ora ei si bo ta mira e muchanan lòs.
Bida diario
Skucha i respetá ta e palabranan klave durante di e workshopnan. Serka esnan di mas hóben Matthijs ta kuminsá un ritmo riba kua e alumnonan ta kuminsá toka un pa un. Na kuminsamentu esaki ta bai ku poko boroto, pero segun e palunan sigui den e sírkulo di mucha, ta surgi un ritmo firme i niun hende no ta papia mas. Serka alumno mas bieu Spalman ta usa un sirkulo: Un sierto persona ta disidí e ritmo i e otronan ta partisipá.
Pa medio di e workshop e alumnonan ta siña skucha otro, no grita duru i asina respetá otro. “Kos ku ta importante den bida diario tambe”, Speltman ta bisa. Tin bia esei ta mas fásil pa logra via muzik ku na un otro manera.”
Outor Elisa Koek