E tereno sin doño entre e lugá di basha sushi di Parkietenbos i e mondi di mangel di awa band’i dje – potrèt: Ariën Rasmijn
ORANJESTAD- Habitantenan den besindario di e lugá di tira sushi na Parkietenbos ta hartá di e molèster di huma i sushamentu. Nan ta sospechá ku ta e kompania ku ta prosesá sushi Serlimar mes ta pega e kantidat di kandelanan na e landfill. Un paseo den boto banda di e lugá di tira sushi ta mustra un imágen manchá di un sushamentu ku a sali for di man.
Jan Jaap van Russen Groen ta biba den besindario di Bucutiweg, pega pega banda di e lugá di basha sushi. Durante un gira ku su boto e ta mustra e impakto di e dùmp riba e paisahe. E bahia aden na Bucuti ta rondoná ku un mondi di mangel di awa hopi será. Mas serka bo yega na e dùmp mas bashí e paisahe ta bira.
Tin un huma blanku stinki ta bini for di e seru di sushi tras di e mangelnan di awa, ku ta keda kologá riba e awa. “Tin bia e huma ta asina diki ku riba laman kasi bo no por mira nada.”E kos aki ta stroba Van Russen, i otro kapitan ku ta keiru henter un dia ku turista, masha hopi mes. “Hopi bia e turistanan mester tapa nan kara. E kos ta dura un dies minüt i despues bo mester wak kon bo ta bai splika e situashon.”
Kantu di awa den e mondi di mangel di awa ta yen di sushi, tin kaminda asta den kapa riba otro. Na e área entre e dùmp i e mondi di mangel di awa tur palu di mangel ta pretu kimá. Na tur taki tin saku di plèstik kologá.
No ta kant’i e mondi di palu di mangel so tin un kaminda di tira sushi. E refnan na otro banda di e lagun ta yen di plèstik, sushi di kas i asta tayer di outo ku a drif yega for di e dùmp. E holó stinki di e lugá di basha sushi ta yega te aki. Van Russen: “Tur e sushi ei ku ta bula bai laman no por ta bon pa e kantidat di turtuga i manta ku ainda ta biba den e lagun.”
‘Kimamentu intenshonal’
Segun Van Russen e trahadónan di Serlimar mes ta kima e sushi, loke lei no ta pèrmití. “Entretantu e sushi ta asina hopi ku nan ta haña nan ta kim’é. Bo ta mira nan akumulá sushi riba otro ku katapila. E ora ei bo por ta sigur ku ta bai kim’é.”
E ta bisa ku e mes no a mira ku di bèrdat ta hende ku pa bista tabata trahadó di Selimar a sende e kandelanan aki. “Pero semper ta na sierto ora, mayoria bia riba djadumingu, ora ku tur e sushi ta poné riba otro. Mi a tende di otro hende ku nan a mira hende ku jerrycan.”
Bosero di Serlimar Lionel Croes ta ninga ku e trahadónan ta sende sushi na kandela intenshonalmente. “Si ta asina, e ora ei mester trese prueba”, Croes ta bisa. Ta asina si ku konstantemente tin un kandela ta kima bou di e kapa di mas ariba den Parkietenbos. “Esei no ta paga nunka. Ademas regularmente tin hende ta subi e tereno pa dirti koper for di aparato doméstiko. Bon mirá Parkietenbos ta un taimbòm.
Croes ta bisa ku Serlimar aktualmente ta papiando ku diferente partido den estranhero tokante maneranan nobo pa prosesá sushi, por ehèmpel un fòrnu manera na Kòrsou. E problema ta falta di plaka i ta e ministernan di Medio Ambiente i Infrastruktura ta disidí. “Nos mannan ta mará”.
Outor Ariën Rasmijn