Produktor/songwriter Clifford Goilo ta traha den su studio – potrèt: Pieter Hofmann

Produktor/songwriter Clifford Goilo ta traha den su studio – potrèt: Pieter Hofmann

AMSTERDAM – Produktor i skibidó di piesa Rustedbraces (35) kasi no por haña sosiegu. E ta traha simannan largu i den e kuadro aki e ta biaha hopi pa Los Angeles i Londen. Ora e bai di vakashon tambe e ta hiba su ‘hèrmèntnan’pa traha na piesa nobo.

“Pero den muzik mes sí mi ta haña sosiegu. E fishi mes ta masha trankil, bo ta ekspresando bo mes. Bon mirá ta un proseso largu di meditashon. Loke ta hasié pisá ta e ‘hustle’ ei ‘fo.” E tin masha gana di por a bai ku penshun trempan i biba den un kasita na Kòrsou, kon tal ku promé e biba na Los Angeles sí, i gana un Grammy Award.

Ántes
Clifford Goilo, manera su nòmber ta, a deskubrí rock ora Nirvana a saka su megahit ‘Smells Like Teen Spirit’. E tabatin dies aña di edat. Mes ora el a lubidá su lèsnan di piano i su tempu den e kor di mucha Zjozjolí.

Tòg ta te na grandi el a pensa tokante un karera musikal. “Na Kòrsou bo tin e idea ku bo mester hasi algu ku ta trese siguransa. Despues bo por hasi un hòbi komo trabou pasobra e ora ei bo tin un back-up. E isla ta muchu chiki? Kisas bèrdè.”

Asina na prinsipio Goilo a skohe un estudio di IT, pero tòg el a resultá den industria di muzik. Na e studio di muzik na Amsterdam FC De Walvisch el a traha muzik prinsipalmente pa propaganda na televishon.

Esena hulandes
Despues el a dediká su mes na muzik pòp. “Bon mirá ta e ‘scene’ hulandes mi ta traha p’e mas parti. Por ehèmpel Sharon Doorson, Ladies of Soul i Alain Clark. Anto dance, den e área ei Bakermat ta mi éksito di mas grandi.” E single ‘Teach Me’ a kue plátina. “I ‘Something Beautiful’di Sharon Doorson awor tin un aña ku el a sali i ainda ta tok’é na radio. Ta manera kisas e ta birando un evergreen.”

Goilo su ta trabou no ta keda limitá na Hulanda so. Den e lunanan binidero ta bai sali un single di Mandy Jiroux, ku ántes tabatin un show huntu ku Miley Cyrus. Tambe un koperashon entre e grupo merikano di rèp Bone-Thugs-N-Harmony i Sean Paul lo estrená e zomer aki.

Rítmika kurasoleño
Goilo su ‘roots’ ta influenshá su trabou? “Riba mi tereno ta e pensamentu tokante rítmika, mi ta kere. Na lugá di konta 1-2-3-4, na Kòrsou nos ta pensa den seis di ocho.” E ta kant’é poko poko. “Ta-ta-ta-ta… no ta un lucha den mi kabes, pero mi ta eksperimentá kuné si.”

E ta toka un piesa di Sharon Doorson ku el a produsí. “Atelakí. Bon mirá ta un chapi den un track, awesome no? Ku esun aki aña pasá el a sera su show Radio 538 XXL den Ziggodome. E yama ‘You Know What’. Probablemente lo e sali e luna aki.”

Outor Pieter Hofmann