Andrew i Meghan Plaate, duo di BLVCKHAZE – potrèt: Deya Mensche
WILLEMSTAD – Últimamente un fluho di talento urbano di origen krioyo ta penetrando i dominando oido di e hubentut hulandes i antiano. E artista urbano hulandes moderno ta un híbrido multilingual ku ta selebrá su raisnan étniko ku su músika i ta sobrepasa tur liña rasial i tradishonal.
Ret Karibense kièr a duna atenshon na e duo BLVCKHAZE, ku ta kreando pauta ku nan músika i komprondé kiko di Kòrsou ta influensia nan. Tambe nos a kòmbersá ku kritiko di músika, DJ i direktor di videoclip Selwyn de Wind, kende a duna un komentario riba e desaroyo akí i e músika ku ta ser produsí.
Eskapé lukrativo
Ret Karibense a kòmbersá na Cas Abou ku e duo ku ta konsistí di Meghan Plaate – Thijn i Andrew Plaate, tur dos di 21 aña. E hóbennan a nase na Kòrsou, pero a muda pa Hulanda ku 18 aña pa kontinuá nan estudio. Meghan kièr a studia lei i Andrew a bai pa Físika Apliká, pero despues di algun aña di lucha ku estudionan pisa, músika a proba di ta eskapé lukrativo. N’e momentu ku BLVCKHAZE a drenta den studio ku e konosido kantante i kompositor rubiano Jeon, kende ta fungi komo un mentor pa e duo, varios kolaborashon i kantika a keda produsí.
Si mester deskribí nan zonido, Andrew, kende ta produsí tur e músika, ta splika ku e ta hopi baliabel i tin influensia di House, Reggaeton i Afro House. “Nos gusta mix género”, Meghan a añadi. “Semper nos a atmirá Jeon, pero ora nos a kuminsá traha ku n’e, ela hasí nos hopi mas kritiko pa ku nos músika”, Meghan a splika.
Issue cover di Nathan Wu
Single
Ku e single ‘Issue’, BLVCKHAZE a kuminsá haña atenshon di radio lokal, i asta a subi top 40 na Kòrsou i Surinam. “Ku e kantika nos kièr a visualisá e emoshon ku un persona por sinti, ora un relashon termina. Si bo pareha no ta trata bo bon, bo por bisa, ‘Legumai swá”, Meghan a splika. N’e momentu Andrew a traha e ritmo, e tabata sa ku esaki ta un hit. Tambe nan mes a filma e clip na Italia i despues Andrew a edita e produkto final. Selwyn de Wind sigur a keda impreshoná ku e duo su promé produkshon. “Mi a gusta e kombinashon di hulandes i papiamentu, i BLVCKHAZE ta diferente i atraktivo komersialmente. Nan tin talento i e clip ta duna un bon mensahe i nan mester kultivá esaki”, e DJ a kontinuá.
Banda di e kolaborashon musikal, Meghan i Andrew a kaba di drenta e boto matrimonial na Ougùstùs 2015. Seis aña pasa, Meghan ya tabata pone su covernan di Bruno Mars, Katy Perry, Chris Brown riba YouTube i Facebook, riba kual Andrew a reakshoná i sobra ta pa historia. Na Ougùstùs 2014, nan a bin vakashon i ya Andrew tabata planeando pa pidi Meghan pa kasa. Andrew a skohe Cas Abou, paso e ta nan bich favorito i semper nan ta bin landa einan. “Nos lo a bai bou di awa ku tanki nan di scuba”, Andrew ta kòrda.
“Yu, mi a spanta bini ariba, ora ela skirbi ‘Marry Me’ riba e bòrchi di bou di awa”, Meghan a splika.
Aruba
BLVCKHAZE a kaba di regresa fo’i Aruba unda nan a graba dos clip ku Jeon i Ritmo Real, i tambe nan ta trahando riba un kantika ku Area 51. “Porta nos lo saka un albùm otro aña, pero nos mester haña mas presentashon pa nos fanatikada a krese”, Andrew a finalisá.
Outor Deya Mensche