Pasahero di Airberlin den e sala di espera pa bodyscan | Potrèt: Dick Drayer
WILLEMSTAD – “Ántes e mulanan tabata bai ku mas kokaina pa Oropa, awor ta mas mula, ménos kokaina. E bandanan di droga ta plama nan riesgo pa no pèrdè tur kos den un tiru.” Asina Kenneth Hellement, kabes di e tim di duana na Hato ta bisa.
Na 2015 a gara 90 mula ku 133 kilo di droga. Den e promé seis lunanan di e aña aki a arestá mes tantu mula kaba, pero ku solamente 57 kilo.
Un kaminda di dos direkshon
“E trafikashon di droga ta bai den dos direkshon awor: kokaina i heroina pa Hulanda i Alemania, hash i xtc djei pa Kòrsou”, Hellement ta bisa. Ku 12 hende e tim di Hato ta kontrolá pasahero i maleta ku ta sali i drenta.
Segun e duanero esaki ta posibel pasobra e bodyscan ta traha atrobe for di desèmber. Banda di esaki e tim tin seis kachó ku por hole diferente tipo di droga i kantidatnan grandi di plaka kèsh.
Hóben
“Awor nos ta gara e gulidónan di bolita mas fásil”, Hellement ta bisa. Esaki ta sosodé a base di profiling. “Tiradó di kontrabanda bo ta topa den tur parti di komunidat. Espesialmente hende hóben entre 17 i 30 ta riska. Lástima si, tòg ta hubentut ta futuro.”
Ora papia ku e trahadónan di duana ta sali ku profiling ta espesialmente riba kondukta. “Hende koló skur ta bisa ku ta pa motibu di nan koló nos ta saka nan for di rei, pero hende blanku ta bisa nos meskos.”
Segun Norman Serphos, bosero di Ministerio Públiko, e garamentu di kontrabandista di droga a bai dilanti ora Alemania a reklamá. “Nan no tabata sa ta kiko ta pasa nan ora Airberlin a kuminsá bula riba Kòrsou. Na Alemania nunka nan no a mira un fluho grandi asina di droga djafó. Na e kumbre un kuart di tur sèl na Düsseldorf tabatin mula di Kòrsou den nan.”
Ròl di Hato
Korte Komun i Ministerio Públiko a palabrá un kombenio pa manehá e fluho di e kantidatnan di mula di droga. Wes di prensa Sigmar Carmelia ta splika ku kada dos siman tin un seshon na Hato, kaminda ta sentensiá mula. “Ministerio Públiko a dediká un fiskal spesial i nos ta duna espasio pa tene seshon.
Wes mayoria parti ta sigui e kastigu ku OM pidi. “Semper e wes ta wak sirkunstanshanan personal. Pero ta importante tambe ku e wes ta wak si tin ripitishon: ta bo promé bia òf nò?. I e peso di e kantidat di droga. Si kue un hende pa promé bia i haña por ehèmpel un òf dos kilo di kokaina, e por haña 24 luna, di kua 12 kondishonal i un temporada di prueba di tres aña
Na kaminda pa e skèn di bolita | Potrèt: Dick Drayer