Simpatisante di National Alliance ta hisa man pa mustra ku e partido ke gana dies asiento – potrèt: Today/ Milton Pieters.
PHILIPSBURG – E kampaña pa elekshonnan di 26 di sèptèmber a kuminsá ku postulashon di kandidato i ekspreshon di sosten pa e partidonan ku no a kue niun asiento den elekshonnan di 2014.
Un partido a kai afó – un kombinashon di tres partido ku huntu tabatin solamente tres kandidato riba lista – pasobra nan no a haña sufisiente firma. Hope di Mercedes van der Waals-Wyatt a keda na 66 firma, leu bou di e kantidat di 146 ku mester – 1 porshento di e kantidat di voto bálido den elekshon di 2014.
Konvensé
Partido kristian di Wycliffw Smith si a logra esaki ku 221 firma. Benjamin Ortega su St. Maarten Development Movement (SDM) ku 191 tambe a alkansá. Gracita Arrindell su People’s Progressive Alliance PPA ku 165 firma i One St. Maarten People Party ku 150 firma tur dos tambe por partisipá.
Djaluna tur e partidonan a entregá nan lista di kandidato serka Jason Rogers, presidente di Sentro Elektoral Sentral. Theo Heyliger su UP, Frans Richardson su USP, promé minister William Marlin su NA i presidente di parlamento Sarah Wescot-Williams su DP tur lo t’ei riba 26 di sèptèmber. E partidonan ku a kue asiento kaba na 2014 no tin nodi di sostené nan lista ku 146 firma.
Sentro Elektoral Sentral ta investigá e listanan di kandidato den un reunion será riba djabièrnè. Djaluna e ofisina lo laga e partidonan sa si tur kos ta na òrdu.
123 kandidato
Na tur e ocho partidonan a trese 123 kandidato dilanti; esei ta 40 porshento mas haltu ku e kantidat di kandidato ku a partisipá na elekshonnan na 2014.
Tin 22,302 votadó registra. Si meskos ku na 2014 e asistensia keda pega na 70 porshento esaki ke men ku lo tin 15,611 voto i ku pa gana un asiento mester di 1,041 voto.
Outor Hilbert Haar