Devi Dev – potrèt: Facebook
WILLEMSTAD – Pa e seri di potrèt riba músika, Ret Karibense a kòmbersá ku Devi Dev, un yu Kòrsou kantante di rap ku ta biba na Hulanda, i ku tambe ta dominando e oido di e hubentut hulandes i antiano.
E artista ta skohe pa rap na papiamentu i asina ta selebrá su raisnan pa medio di su músika. Tambe nos a kòmbersá ku e DJ i direktor di videoclip Selwyn de Wind, kende a duna un komentario riba e desaroyo nan den e genero urbano i e músika ku ta ser produsí.
Famia
Jurick Job di 26 aña a nase na Kòrsou, pero a muda ku su famia pa Hulanda ku shete luna. Na rais di e amor pa Kòrsou ta un hóben ku a surpasá varios reto den su infansia, transformando den un hòmber ku su famia ta para sentral. Devi Dev a lanta den e siudat di Capelle aan de Ijsel, i segun su propio atmishon, e tabata hopi mala mucha.
Den su músika e ta splika kon turbulento su infansia i trayektoria eskolar tabata. Komo mucha di ocho aña ela pasa dos aña den internat, paso su mama Sharella no por a maneh’e. “Awó ku mi tin un yu muhé, mi sa ku karma ta bini bèk”, ela rekonosé. “Pero mi no a lanta ku mi tata, i esei tabata un buraku den mi bida i mi a sòru pa mi yunan no lo pasa den esei”, e tata di tres a splika.
‘Panda remix’
Devi Dev tabatin un par di bròder ku tabata rap serio, i ela splika kon e tabata bai kas den skondí i trein. ”Mi a kuminsá graba ku 16 aña i ma graba un ‘diss track”, ela kompartí. Desde dia djawe, Dev ta forma partí di Talk Riders crew, i banda di e label, nan a lansa un liña di paña urbano yama ‘The Riders Family’. E impakto di e hit nan ‘Panda remix’ i ‘Na Bida Mi Ta’ a kue Devi Dev un tiki fo’i base. “M’a saka Panda na aprel, unda m’a yega studio i a zuai e ko’i den un tiru”, e hóben a splika. Despues di dos dia ku ela lansa e kantika, Devi Dev kuminsá a haña hopi petishon pa presentashon na Hulanda.
Según Selwyn de Wind, esaki ta demostrá e poder di internet i kon e teknologia a avansá. “Últimamente, Kòrsou a bira más popular na Hulanda i awó ku hende sa mas di nos isla, e artista kurasoleño ta más orguyoso pa bisa ku e ta di Kòrsou”, de Wind a splika. “Devi Dev ta hopi fuerte na letra i e ta hungá ku palabra riba un manera tremendo”, de Wind a añadi.
Apesar di a lanta den un kas ku semper a papia positivamente di Kòrsou, i unda tur hende a papiamentu libramentu, Dev a bai Kòrsou pa promé biaha ku 8 aña. “Mi ta kòrda tur kos. Mi a baha avion i por a tende mi famianan ta grita”, ela kòrda ku un sonrisa. “Akí mi ta sinti mi hopi liber i sin stress. Pero ora mi yega, e promé kos ku mi mester hasí ta pasa wak Tanchi Nana, ku semper ta malkriá mi”, Dev a konta.
Single nobo
Pa e luna nan benidero, Devi Dev ta trahando riba varios proyekto alentador, manera algun single nobo i tambe algun presentashon na Spaña, Aruba i naturalmente su dushi Kòrsou.
Outor Deya Mensche