E tambor den e bario La Guinea – potrèt: Dick Drayer
WILLEMSTAD – dia 10 di mei 1795, tres luna promé ku Tula a kuminsá su rebelion na Kòrsou, tabatin un esklabo ku a hui di Kòrsou i ku a kuminsá un rebelion den serunan di Coro: José Caridad Gonzalez.
“E movementu di liberashon su lider tabata e ‘sambo’ José Leonardo Chirino”, Ieteke Witteveen ta bisa. E ta antropólogo i ta investigá diferente diáspora for di Kòrsou pa tera firme di Venezuela.
E luchadónan venezolano pa libertat, kontrali na nan kompañeronan na Kòrsou bou di mando di Tula tres luna despues, tabata arma solamente ku palu i machete. “A para e rebelion den un dia; e luchadónan pa libertat heridá i kapturá a dekapitá nan mes ora sin niun sorto di proseso, entre nan komo promé José Caridad Gonzales”. Witteveen ta bisa.
Bastian Carpata
“For di dokumento hulandes tokante di e rebelion di esklabo di 1795 di Kòrsou nos sa ku un di e miembronan di mas importante di e rebelion, Bastian Carpata, huntu ku nuebe otro esklabo tabata será na Coro i ku a deport’é pa Kòrsou.“
Probablemente esaki a sosodé djis promé ku e rebelion na Kòrsou, pasobra un esklabo yamá Jean Forcade a haña sentensia di prizòn pasobra e no a bisa outoridatnan hulandes ku el a mira Bastian Carpata na Venezuela.
Diáspora
“Tabatin tres diáspora den historia di Kòrsou i Venezuela” Witteveen ta bisa. “E promé tabata esun indjan, despues ku spañonan a yega i despues hulandesnan den siglo 15. E di dos diáspora tabata esun di esklabo di Kòrsou kasi mesora despues , i den e siglonan ku ta sigui. E di tres tabata esun di e hudiunan sefardí, kuminsamentu di siglo 19.”
E esklabonan ku a hui di Coro tabata konosí pa nan baile ‘al son del tambú’, òf ‘loango tambu’ ku kantamentu di pais leu den nan mes idioma. “E herensia musikal aki ainda ta presente na La Guinea i e bario bisiña Curazaito, tur dos den suit di Coro”, Witteveen ta bisa.
Olga Camacho i su dilanti Ieteke Witteveen – potrèt: Dick Drayer
Tambú
Na Curazaito, mas nobo ku La Guinea, na fin di siglo 19, kuminsamentu di siglo 20 a desaroyá un tambú ku awendia ta yama Tambor Coriano. E herensia bibu aki e kantante Olga Camacho ku entretantu a fayesé a yuda hasi famoso. Witteveen: “Ta konsiderá La Guinea e promé bario di biba di Coro.E habitantenan tabata simpatisá ku e idealnan di libertat for di Haiti, ku tabata yega serka nan via Kòrsou.”
Haiti
Na fin di siglo 18 tabata konsiderá Kòrsou komo un sentro di konspirashon revolushonario. “No tabata straño pasobra masha tempu tabatin un relashon intensivo komersial entre Kòrsou i Haiti”, segun Witteveen.
“Asina Haiti tabata bende kòfi ku Kòrsou, miéntras barkunan di Kòrsou tabata drenta hafnan na Haiti ku tela i otro kos. E baimentu bini aki di hende entre e dos paisnan a fasilitá e plamamentu di idea revolushonario.”
“Ademas tabatin hopi refugiado haitiano na Kòrsou i tabata bende esklabo di Haiti ku plantashinan na Kòrsou. Kisas esei ta splika ku esklabo di habla franses a partisipá na e rebelion di katibo na Kòrsou na 1795.”
Tambor
“E diaspora di esklabo na Venezuela te awe por sigui mirando kon Tambú a plama den e diferente estadonan di e pais”, Witteveen ta bisa. “E Tambor Coriano asta tin un na Papiamentu. Bo por skuch’é na La Guinea i Curazaito.
Outor Dick Drayer