E promovendus ta bai kolektá literatura, arte i fragmento di vidio pa su investigashon – potrèt: John Samson
HILVERSUM – Kon ta pensa tokante homoseksualidat na e islanan? E promovendus kurasoleño Wigbertson Isenia e kuater añanan binidero ta hasi un investigashon sientífiko. Ku komo resultado final un ‘database kultural’.
Mas i mas ta papia mas abierto tokante homoseksualidat na e islanan i homoseksualnan ta mas bisto, Isenia ta ripará. Pero si berdaderamente bo ke haña sa mas tokante homoseksualidat den e kultura lokal, esaki lo bira difísil. “A hasi tur sorto di investigashon, pero nunka no a investigá kon e hendenan ta pensa tokante seksualidat. I mas importante: kon nan ta eksperensiá esaki.”
Tin hopi stereotipo Isenia ta bisa. “Por ehèmpel den komedia kaminda un homoseksual ta aktua komo un mariku di bòmbòshi.” Awor por studia bida kultural i posishon kultural di e diferente gruponan homoseksual detayadamente. Kon e bida ei tabata i kon e ta awor? I kon e emansipashon ta desaroyá na e islanan?
Mundunan di macho
Isenia ta papia entre otro ku lidernan religioso, polítiko, alumno di skol i artista. E ta investigá e mundu di tambú i e ta pasa snèk. “Mi ta bai drenta den diferente mundu di machu i mi ta bai buska pa sa si homoseksual tambe ta pasa den e mundu ei. Anto riba ki manera?
E promovedó ta bai Kòrsou bèk pa buska e historianan ku a keda skondí. “Hopi di e historia ta bai pèrdí poko poko, pasobra e no ta dokumentá. Esei ami ta hasi awor, ku crowdsourcing”, Isenia ta bisa. “MI ta spera ku asina mi por alkansá e hendenan i ku nan por kontá mi nan historianan i nan eksperensianan.”
Kiko ta e benefisio di esaki?
“Mi ta kere ku e investigashon aki ta duna un kontribushon grandi na e diskushon tokante i e aseptashon di homoseksual na Boneiru i Kòrsou. E por trese solushon for di nos mes kultura, na lugá di idea hulandes”, segun Isenia. “I si tin mas noshon sosial i históriko, esaki ta pone bo traha mihó maneho.
Archivo
Na final ta e intenshon pa Isenia banda di su tésis bini ku un archivo digital di loke a haña di literatura, arte, i fragmento di vidio. “Esaki ta e base i esei no tin ainda. Ta importante pa awor bini un database pa otro investigashon den futuro. Pero tambe pa tur hende ku ke komprondé homoseksualidat for di nan propio kultura.”
Outor John Samson