Mr. Marije Vaders ta pidi i haña posponementu di e kaso – potrèt: Dick Drayer
WILLEMSTAD – Ministerio Públiko (OM) ke tende e asesino di Helmin Wiels komo testigu den e kaso Maximus. Den e kaso ei OM ta investigá esnan ku a duna òrdu pa kometé e asesinato.
Durante e promé seshon fiskal mr. Gert Rip a bisa Burney Nini Fonseca ku e ke tende e miembro di No Limit Soldiers (NLS) Michael Leesly.
Fonseca lo a duna òrdu entre otro na Elvis ‘Monster’Kuwas pa mata Helmin Wiels. A kondená Kuwas pa esaki i e ta sinta un kastigu di bida largu den un prizon hulandes.
Gert Rip den e seshon di djabièrnè ta bisa ku Leesly a hunga un papel den e komunikashon entre e doño di loteria Robbie dos Santos i Fonseka. Dos Santos tambe ta konta komo sospechoso den e kaso Maximus.
“Mester tende tur dos testigu, pero no komo sospechoso”, bosero di OM Guillano Schoop ta enfatisá. E ta rekonosé ku e partishon di ròl ta kompliká i ku ta posibel ku nan por inkriminá nan mes.
Posponé
E seshon no a dura mas ku mei ora. Esei tabata espesialmente pasobra OM na yüli a añadí diesseis ordner di investigashon nobo na e fail di Fonseka. Su abogado, Mr. Marije Vaders, ta bisa ku ainda e no a haña oportunidat pa deliberá tokante esaki ku su kliente.
Awor si a hasi palabrashon tokante esaki ku wes mr. Pailides. E seshon ta kontinuá 7 di sèptèmber.
Outor Dick Drayer