Josemir Poulino ta entrená riba e saku di bòkseo bou di guia di coach Raymond Joval (man robes) – potrèt: Pieter Hofmann
AMSTERDAM – E bòksdó Josemir Poulino (28) ta anhelá pa yega kumbre internashonal. Su paternidat no ta strob’é ku esaki, ounke ku e ta tene kuidou pa no ta ousente mes tantu ku su mes tata tabata.
Poulino a gana shete di su ocho peleananan profeshonal, mayoria bia ku knockout. Entretantu e ta kampion di Hulanda i Benelux den peso mediano. Su próksimo pelea ta na sèptèmber na Bèlgika. Na òktober ta sigui e Ben Bril Memorial di tur aña den teatro Carré na Amsterdam i tambe tin papiá di un pelea na Kòrsou na desèmber.
Despues Poulino mester ta por lo ménos den tòp 20 pa e bini na remarke pa un pelea oropeo pa título. “Awor mi ta number 22 di Oropa, number 57 mundial. Mi meta ta pa para por lo ménos na di dies lugá.
Bòkseo ta su karera, no su fuente di entrada. Poulino: “Bo ta pensa: bo ta bira pròf i e kos ta bai sosodé: nò. M’a pensa: mi ta bai Carré bai bati tur hende anto e ora ei si e kos lo bai sosodé: nò.”E ta treinmeinta i anochi, den dia e ta duna trénen personal i trénen di bòkseo pa e tin entrada. Ainda e ta buska spònser.
Isla natal
Poulino a bini Hulanda ora e tabatin mas o ménos diesun aña. “Mi tabatin hopi heimwe. Masha masha hopi mes. Ayabou mi tabata un berdadero Yu di Kòrsou. Semper mi tabata pafó ta piska òf ta tira yuana. A tuma mi hopi aña pa mi kustumá di sinta paden.” Entretantu mayoria di su famianan a muda bai bèk, ta e ku su ruman hòmber so ta biba na Hulanda ainda.
Poulino ta karga su isla kaminda el a nase huntu kuné. E tin tatuahe di bandera di Kòrsou, teksto di himno i e mapa di Kòrsou disfrasá komo tribal. Tambe el a hinka dos gai: unu ku bandera di Kòrsou, i unu ku e tres colonan di bandera di Colombia di kua su tata ta binidero i kaminda ainda e ta biba.
Bòksdó Josemir Poulino despues di treinen ta duna su yu kuminda – potrèt: Pieter Hoffman
Kasi e no tin kontakto ku su tata. “Mi no ta komprondé kon un hende no ke ta tata.” Poulino mes ta gosa di ta tata di Gizelle di nuebe luna. “Bon mirá mi tin gana di por lanta un tiki lat, pa mi esei ta nueb’or. Pero e ta lanta banda di sink’or seis or i mi ta tend’é riba babyfoon. Bin buska mi e ta bisa na lenga di baby. Esei ta presioso, mi ta gosa di bèrdat.”
Un yu no ke men ku loke bo mes presta no ta para sentral mas, e bòksdó ta bisa. “Mi ta bai treinen kuné mas o ménos un bia pa siman. Kasi nunka e no ta yora durante e treinen. Pero si esei sosodé e coach (èks bòksdó Raymond Joval, PH) ta his’é, kana rònt kuné i dun’é bòter.”
Kon e ta haña e ehèmpel di su mes tata awor ku e tambe ta tata? Poulino: “Pa e banda ei mi ta wak mi mama. E tabata bisa mi tin bia: mi ta bo mama i bo tata. Ainda e ta yamá mi tur dia via Skype for di Kòrsou pa mira e baby. É ta mi ehèmpel.”
Outor Pieter Hofmann