DJ Fab  - potrèt: Deya Mensche

DJ FAB – potrèt: Deya Mensche

WILLEMSTAD – DJ FAB ta un yu Kòrsou ku ta hasiendo furor na Hulanda den e genero urbano. Si tin un fiesta of festival unda e komunidat antiano ta aglomera, DJ FAB mester tei pa los e hitnan Afrohouse mas popular. E DJ ta na Kòrsou pa un gira di diskotèk, unda pa e simannan benidero e lo tin varios presentashon.

Manera ta kustumber, e lo regresa su isla natal Desèmber próksimo pa deleita e públiko ku un repertorio varia di bon músika i tremendo ambiente. E DJ di 29 aña, a nase komo Fabian Cominencia den e bario di Kwartje. Despues di a kaba su MTS, e hóben a muda pa Hulanda na 2006 pa studia komputashon tékniko, pero despues di tempu, ela tuma un pausa ku e intenshon di regresa pa kab’e, pa desaroyá su karera musikal.

Un reportahe di Deya Mensche

Despues di sinku aña na Hulanda, DJ FAB a disidí di tuma DJmentu mas na serio. “E kos a kuminsá hopi espontaneo, unda ami semper tabata sòru pa tin músika na fiestanan di mi bròdernan”, ela splika. “Inisialmente m’a kere ku ta ekipo nan tabata malu, i m’a bende nan i kumpra otro. Pronto mi a ripara kuantu mi mester a trein pa bira bon den esaki.”

Perfekshoná bo arte
Según Cominencia, komo bon DJ, bo mester tin e abilidat pa sinti bo públiko. “Bo no por yegá i kuminsá toka loke abo ta haña ta bon. Tambe téknika di meks ta importante”, e DJ a splika.

Si ela atmití ku tin DJ ta daña nan nòmber dor di opta pa prepara un meks adelanta i bin toka esaki durante e fiesta. Tambe DJ FAB a kaba di lansa su ultimo ‘mixtape’, yama Fabulous mixtapes, i lo lansa vershon 7 na Novèmber. “Ami ku un par di bròder ta trahando riba un albùm bou di e nòmber FAB”, Cominencia a añadi.

 - potrèt: Deya Mensche

MC Don T – potrèt: Deya Mensche

MC Don T, mihó konosí komo Viendri Eleonora, kende ta anima varios fiesta urbano na Kòrsou i Hulanda, ta mira un diferensia grandi entre fiestanan urbano na Hulanda i Kòrsou, pero e ambiente i desaroyo di e genero si ta mes un kos. “E públiko kurasoleño ta eksigí mas i mester aklimatisá promé ku e kuminsá gosa”, ela splika. E rol di e MC ta esensial, unda e animado ta yuda e DJ kreá e ambiente mas rápidamente.

Según MC Don T, DJ FAB ta bayendo hopi bon, espesialmente bou di públiko antiano, unda e ta traha hopi ku e banda Cache. Tambe ela rekonosé ku Hulanda ta legendario den kultivashon di DJ ku ta destaká internashonalmente, espesialmente den e genero di House. Pero e genero urbano no ta keda atrás. “Na Hulanda tin un faktor di inklushon. E DJnan ta forma un klik selektivo i nan, of e promotor, mester duna bo un oportunidat”, e MC a elabora. Poko poko, pero sigur DJ FAB ta bayendo den e bon direkshon, i asta a toka na festival grandi manera CrazySexyCool, unda mas diferente tipo di hende ta asistí.

Grupo di artista urbano antiano
Na Òktober, DJ FAB lo forma partí di un grupo di artista urbano antiano ku lo hasí un gira di diskotèk na e sentro turístiko popular Lloret de Mar, na Spaña. “Ta di dos biaha ku nos ta bai, i e biaha akí nos a plania e kosnan mas mihó pa tin mas toka”, ela konkluí.

Outor Deya Mensche