Kampaña na Kranshi. Demokratnan por partisipá atrobe na sèptèmber | Potrèt: Dick Drayer
WILLEMSTAD – Shete partido nobo ta partisipá na e próksimo elekshonnan di Staten na Kòrsou. Di e partidonan nobo nos konosé Partido Demokrátiko kaba: den e elekshonnan di 2012 nan no a logra kue niun asiento, pero e aña aki nan por purba di nobo. Geraldine Parris na kabes di lista a logra haña 1094 ekspreshon di sosten. Kòrsou di nos Tur di empresario Amparo dos Santos a haña mas tantu voto, 2178
Un kantidat rèkert di diessinku agrupashon polítiko a partisipá e wikènt aki pa haña 870 ekspreshon di sosten. E kantidat aki ta stipulá pa lei i ta e resultado di 1 porshento di e votadónan ku den e último elekshonnan na 2012 a bin vota.
Ku e resultado di e elekshon preliminar un total di diestres partido ta partisipá riba 30 di sèptèmber, ora Korsou bai vota atrobe. E partidonan aktual den Staten, Pueblo Soberano, PAIS, PNP, PAR, MFK i MAN ta haña konkurensha di èks polítiko òf èks minister.
Èks polítiko
Asina e Miembro di Staten independiente Omayra Leeflang ku UN Kòrsou Hustu (1361) i Miembro di Staten èks-PAIS Marilyn Moses ku Movementu Progresivo (1240) a logra di haña sufisiente sosten. E Miembro di Staten èks MAN Charles Cooper a hasi meskos kus su partido nobo PAS (1543). Èks promé minister Ivar Asjes ku Pro Kòrsou (965) i èks minister di Enseñansa Rene Rosalia ku Kousa Promé (1122) ta aden atrobe dia 30 di sèptèmber.
Resultado di kada partido ku nan kabesnan di lista | Grafik Norbert George
Nan a haña sosten di un parti di e 12.118 hende ku derechi pa vota, ku a tuma trabou di bai un di e sinku lugánan kaminda por a vota. Esei ta un dies porshento di tur esnan ku tin derechi di vota. E di seis lugá tabata prizòn SDKK kaminda e detenidonan por a vota. 181 prezu a vota. Mayoria di e votonan a bai pa Kòrsou di nos Tur di Amparo dos Santos: 122.
Kustumá
Hopi grupo polítiko ku ke presensiá na elekshonnan na sèptèmber a warda nan votadonan e wikènt aki ku blas i bandera. Un partido asta tabatin un foyeto ku puntonan di e programa pa parti. E otro gruponan mester a kustumá di hiba kampaña. Kasi tur ta di akuerdo ku gobièrnu mester invertí den enseñansa, i ekonomia. Ora a puntra pa un presupuesto pa enseñansa i kuantu mester invertí, tur esnan nobo a haña nan ta keda ketu sin por kontestá.
Outor Dick Drayer