Kandidatonan di MFK – potrèt: Deya Mensche
WILLEMSTAD – 30 di sèptèmber próksimo tin elekshon atrobe i na kaminda pa esaki Ret Karibense ta dediká dos artíkulo na kada partido. Nos a bishitá Movementu Futuro Kòrsou, MFK, na nan sede na Saliña.
Elekshonnan 2016, Ret Karibense ta presentá e partidonan: Parti 1 MFK
Ofisialmente, MFK a keda funda pa Gerrit Schotte i Rudney Garmes, dia 17 di Mei, 2010, algun siman promé ku elekshon unda nan a logra optené 5 di e 21 asientonan pa e promé parlamento di pais Kòrsou. Según Schotte, MFK su ophetivo prinsipal ta pa desaroyá un Kòrsou sostenibel asina e pueblo di Kòrsou por biba den un nashon sano i sigur. MFK ta utilisá blanku, ku ta representa puresa i transparensia, komo su kolo prinsipal, i ta usa lèter blou, berde i kòrá pa enfatisá su mensahe.
Deya Mensche a kombersá ku Gerrit Schotte
Plataforma elektróniko
E puntonan prinsipal di MFK su programa di partido ta entre otro desaroyo di e plan nashonal pa bario, i implementashon di un gobièrnu habri pa medio di un plataforma elektróniko. Según Schotte, esaki ta duna posibilidat pa sinkronisá planifiká desaroyo nan riba otro áreanan di maneho, manera enseñansa, naturalesa i medio ambiente, hustisia i finansa. Tambe MFK ta para pa desaroyá kapasidat empresarial unda un persona por trese su idea pa un proyekto konkreto, generando inovashon i empleo.
Siguientemente MFK ke garantisá enseñansa di kalidat den nos pais unda e poblashon multikultural i lingual por traha entre otro den servisio finansiero i turismo. Akí MFK ke probechá di e posishon geográfiko ku ta duna nos oportunidatnan regional.
MFK ke aselerá kresementu ekonómiko dor di atraé profeshonalnan ku ke imigrá pa Kòrsou i ku lo kreá oportunidatnan riba nos isla. Tambe MFK ke kreá entre 1.500 pa 3.000 kupo di trabou, kompañá pa proyektonan ku lo nase ku invershon nan lokal i estranhero. Schotte a splika ku mester simplifiká e prosesonan laboral i e forma di hasí trámite.
Gerrit Schotte
E kambio pa un maneho Energétiko Fósil, independisando nos di e maneho energétiko ku tin nos mará na petroli, ta sumamente importante pa e partido. Según MFK esaki ta bai duna nos kontrol riba nos ekonomia i kosto di bida, i asina kosto di hasimentu di negoshi den Kòrsou lo baha. Ademas MFK lo duna prioridat na mehorá infrastruktura rònt Kòrsou, i kreá un maneho finansiero sano i introdusí reforma di estado.
Voto popular
Finalmente MFK ke introdusí leinan ku ta permití nos skohe un Promé Minister ku voto popular direkto, i enkaminá un proseso ku ta permití ku tambe ta skohe parlamentarionan ku voto popular direkto.
Outor Deya Mensche