Dana i Emily ta simpatisadonan di MFK – potrèt: Deya Mensche
WILLEMSTAD – A kòmbersá na sede di Movementu Futuro Kòrsou, mihó konosí komo MFK, ku varios votado di e partido blanku i kandidato riba lista, ku ta identifikando ku e yamada pa ban kambia nos bida. Hopi hende muhé i hóben tabata presente na e sede durante e presentashon di lista, ku ke mira un kambio den e status quo.
Elekshonnan 2016, Ret Karibense ta presentá e partidonan: Parti 1 MFK
“Ami ta simpatisá ku MFK paso mi ta kere den un partido yòn. Kuater aña pasa mi a yuda nan i nan a yama mi bèk paso e partido ta kere hopi den hóben”, Dana a splika. Tambe e por identifiká ku varios puntonan di gobernashon ku a keda trata den e plan di gobernashon. “Spesífikamente nan a hasi hopi den mi bario di Mari Pampoen ora nan tabata sinta”, Dana a kontinuá.
150 bario
“Ta lamentabel ku tin 150 bario ku un kontrishon sosial ekonómiko no ta benefisiá niun habitante, pero tòg durante e ultimo kuarenta aña nada no a sosodé”, lider polítiko Gerrit Schotte a deklará.
Según Schotte, den e plan nashonal ambisioso pa desaroyá bario, MFK a pèrkurá durante e ultimo shete aña, pa dediká na rekobrámentu di espasio públiko bèk na bario, pa asina esaki bira más sigur.
Trabou
Durante e enkuentro, tabatin hopi gritu pa bini un kambio den e direkshon ku nos komunidat ta bayendo. Mester bini un kambio espesialmente pa trabou. “Ami tin yu ku ñetu ku mester di trabou, pues algu mester pasa”, Emily a splika. “P’esei mi ta tur tur ku MFK, pa nos ban pa e kambio akí”, e mamanan preokupá a deklará.
Jacinta Constancia – potrèt: Deya Mensche
Jacinta Constancia, parlamentario pa MFK, kende tabata enbolví ke partido fo’i su inisio, atrobe ta pone su mes disponibel pa sirbi su komunidat. E partido sosial demokrátiko ta di opinion ku nan no a haña un chèns pa kaba e trabou ku nan a kuminsá, pasobra e gobièrnu a ser tumba despues di dos aña so.
Sistema di ámtenar
Según Amérigo Thode, MFK ta haña falta di tur kos, pero e ta enfatisá ora pais Kòrsou a keda funda, e gobièrnunan anterior no a regla nada pa e pais tabata prepara pa funshoná manera debe ser. “Tabatin 3 mil funshon den e sistema di ámtenar ku a bira absoluto, pues MFK mester a strukturá tur esaki”, e parlamentario a deklará.
E parlamentarionan ta spera ku pueblo di Kòrsou lo hasí un eskoho pa MFK so forma gobièrnu pa asina por ehekutá e vishon di kambio ku nan ta spera di implementa durante e periodo di gobernashon benidero.
Outor Deya Mensche