Enkuentro na sede di Pro Korsou - Jose Manuel Dias

Enkuentro na sede di Pro Kòrsou – potrèt: José Manuel Dias

WILLEMSTAD – Nos ta bai lòs tur e mega proyektonan ku ta pendiente pa asina nos ekonomia kuminsá floresé”. Esaki ta lokual Ivar Asjes lider polítiko di partido Pro Kòrsou (Propósito pa Kòrsou) ta bisa di bai hasi si su partido logra haña mandato durante e próksimo elekshonnan. Asjes ta referí na entre otro e proyekto pa modernisá refineria Isla i e instalashonnan na Bullenbaai, e proyekto pa konstruí bibienda na Wechi i e plan di desaroyo turístiko na Ostpùnt.

Elekshonnan 2016, Ret Karibense ta presentá e partidonan: Parti 2 Pro Korsou

Elekshonnan 2016, Ret Karibense ta presentá e partidonan: Parti 2 Pro Kòrsou

Segun Asjes si ekonomia krese ta nifiká ku lo tin mas hende ta traha i ku ta paga impuesto i primanan sosial ku na su turno lo nifiká mas entrada pa gobièrnu i ménos défisit den nos fondo di penshun. Esaki no solamente lo baha e tasa di desempleo pero alabes lo krea espasio pa oumentá por e plaka di ònderstant i penshun di behes.

José Manuel Dias den kòmbersashon ku Ivar Asjes

Ku maron komo koló Pro Kòrsou ta un di e shete partidonan nobo ku lo partisipá den elekshonnan di 30 di sèptèmber. Despues di a kibra ku partido Pueblo Soberano i a baha komo promé minister na ougùstùs 2015, Ivar Asjes a disidí di kontinuá ku su karera polítiko i a lanta su propio partido dia 24 di novèmber 2015 huntu ku su konsehero prinsipal Tania Ataoellah-Henriquez. E partido su ideologia ta sosial demókrata i ta para pa prinsipionan manera solidaridat, hustisia sosial, partisipashon i inklushon di tur siudadano.

Vishon
Asjes ta mira Kòrsou komo un komunidat inovativo ku tin un kalidat di bida sólido, kaminda tur siudadano tin oportunidat igual pa ta próspero i desaroyá su talento i habilidatnan di un forma optimal. Bou di e lema di unidat i resultado Pro Kòrsou ta kere den un mihó balansa entre e parti finansiero i e parti sosial kultural enfoká riba bon edukashon, salubridat di kalidat i un kuido sosial optimal.

Puntonan prinsipal
Banda di pone ekonomia floresé partido Pro Kòrsou su enfoke ta pa invertí den desaroyo di hende atraves di un plan stratégiko pa edukashon kontinuo. “For di ora un mucha nanse te ora e persona bira un adulto mayó e mester disponé di edukashon riba un base kontinuo”, Asjes ta enfatisá. Mas aleu e partido ke fortifiká famianan di Kòrsou ofresiendo nan yudansa riba diferente área. Un di e inisiativanan ta pa bini ku un trayekto pa sanea debe di famianan di ménos rekurso.

Outor José Manuel Dias