Brindis pa eksito di partido Pro Kòrsou – potrèt: José Manuel Dias
WILLEMSTAD – “Awor si ta basta, mi ke mira un kambio den e kalidat di kuido ku ta duna na nos grandinan, p’esei mi a disidí di sostené partido Pro Kòrsou”. Esaki ta palabranan di Sra. Elli ku ta kere firmemente den e kapasidat di Ivar Asjes pa logra e kambionan deseá. Meskos ku Elli ta hopi ta e simpatisadónan di Pro Kòrsou ku ke mira kambionan tuma lugá riba diferente tereno manera entre otro salubridat, kriminalidat i enseñansa.
Elekshonnan 2016, Ret Karibense ta presentá e partidonan: Parti 2 Pro Korsou
Na opinion di un otro simpatisadó e sektor di enseñansa ta un di e áreanan ku mas mester di kambio. “Tin demasiado mucha ku ta kai for di nos sistema di enseñansa i mester inkluí nan bek na skol”, asina Sr. Juan a enfatisá. Otronan ta boga pa Asjes krea mas empleo pa nos hóbennan i drecha nos forsa di kompra.
Gobièrnu limpi
“Ivar Asjes su ideanan ta hopi bon i ohalá e por bira promé minister pasobra e ora ei nos sa ku nos tin un gobièrnu limpi i stabil”. Esei ta opinion di Sr. Prudencia kende ta boga pa un gobièrnu liber di korupshon. Por lo general e simpatisadónan di Pro Kòrsou ta haña ku Asjes a hasi un bon papel komo promé minister i a demostrá di por goberná nos pais na un manera drechi.
Kla pa elekshon
Awor ku e pre elekshon ta tras di lomba i kaminda e partido a logra haña e sosten nesesario pa por partisipá n’e elekshonnan benidero Pro Kòrsou ta kla pa hasi un ‘grandslam’. Asina kofundador i alabes number dos riba lista Tania Ataoellah-Henriquez a bisa durante un enkuentro na sede di partido situá den kurason di e bario di Brievengat. Den un ambiente festivo ku hopi bandera i ku hopi animo dirigentenan, kandidatonan i simpatisadónan a hisa nan glas i a brinda pa éksito di e partido.
Entre e esnan ku ta sostené partido Pro Kòrsou diferente a bini for di partido Pueblo Soberano. Ma djòin Pro Kòrsou pasobra mi ta un bon soberano i komo bon soberano na momentu ku e lider ku nos a vota p’e kuater aña pasá no tei mas, nos tin ku vota pa esun ku tabata promé minister pa Pueblo Soberano. Sra. Maduro ta un di e soberanonan ku a disidi di bandona filanan di Pueblo Soberano pa djòin Pro Kòrsou i sostené Ivar Asjes.
Outor José Manuel Dias