TILBURG – Awe a tuma despedida di Ferry Bakx na Tilburg. E polis a muri siman pasá na edat di 45 aña ora e tabata pèrsiguí un atrakadó armá ku a tir’é. P’esei Bakx a haña un entiero di honor di kuerpo di polis.
Un warda di honor ta kompañá e kaha, tapá ku bandera hulandes, pa e krematorio. Dilanti ta kana dos tokadó di tambú. Na e entrada algun dignitario di polis ta warda nan. Nan ta duna saludo na e kola. Minister di Seguridat i Hustisia Ard van der Steur ta para banda di nan. Mandatario polítiko di Boneiru òf di Hulanda Karibense no ta presente awe.
E presentenan ta lanta para ora e famianan di defuntu Ferry Bakx drenta e sala – potrèt: Pieter Hofmann
Hefe di kuerpo suplente Rosales (Kuerpo Polisial Hulanda Karibense) ta deskribí Bakx komo un hòmber amabel i trankil ku tabata sa di kiko e ta papia. Den e tres aña i mei ku e tabata na KPHK el a laga atras un impreshon ku no por lubidá.
Mas famia i kolega ta deskribí Bakx komo un hòmber loyal i modesto kende ku su humor seku por a hinka su komentario den gol mésora. E tabata floresé riba su motersaikel, tras di su sèt di drum i ku su famia, pero na final el a pèrdè su bida trágikamente.
Polis ta duna último saludo na nan kolega defuntu Ferry Bakx – potrèt: Pieter Hofmann
Último saludo
Van der Steur ta entregá e bandera na Bakx su viuda. E koleganan ta duna un último saludo, kompañá pa ‘The Last Post’ riba tròmpèt i un minüt di silensio. Riba steeldrums ta toka himno boneriano, kaba esnan presente ta hasi un último ròndu di e kaha.
Un total di 2000 hende a sigui e entiero via live stream. Mas o ménos 100 hende, entre nan polis, a sigui e seremonia na Boneiru na landhuis Wanapa.
Outor Pieter Hofmann