MAN ta trata di alkansá e votadó den bishita di bario Lider Hensley Koeiman ta pará meimei– potrèt: Elisa Koek
WILLEMSTAD – Na 1971 un grupo di hende, entre nan Don Martina ker a traha pa un kambio pa algu nobo. Nan a kuminsá e partido sosial demokrátiko Movementu Antia Nobo, ku Martina komo lider.
Entre tantu e nòmber kompleto a kaduká i for di 2005 e partido yama MAN. Ku e lema ‘bo futuro ta den bo man’ i èks minister di Asuntunan Sosial Hensley Koeiman na kabes di lista, e partido blou ta spera di gana elekshon. Djabièrnè a sali ku ko-fundadó Don Martina despues di un ousensia di sinku aña ta djòin e partido atrobe.
Lider di partido Hensley Koeiman ta papia ku Elisa Koek
E sinku pilánan di e partido ta Enseñansa, Ekonomia, Kriminalidat, Bienestar i Deporte. MAN ke bai pa dies meta manera kreamentu di un fondo di deporte; oumentu di suèldu mínimo i oumento di edat di penshun, pasobra ‘mundialmente niun hende no ta skapa di e subimentu di edat di penshun’, Koeiman ta bisa.
Enseñansa i Deporte
MAN ke pa talentonan por desaroyá i ku enseñansa ta bai mas leu ku e parti kognitivo. Arte, kultura i deporte lo bai hunga un papel mas grandi den enseñansa.
Koeiman ta konta ku tin hopi talento deportivo na Kòrsou i e ta haña ku aktualmente nos ta usa nan muchu poko. P’ései e partido ke pa bini un fondo di deporte pa asina ofresé e mihó guia, infrastruktura i medionan na talento hóben. “Ku mas atenshon pa deporte, mésora nos ta kombatí un di nos enfermedatnan di mas grandi: obesitas.”
Bienestar
E kalidat di bida mester subi segun MAN. Hende mester sinti nan mes seif, apresiá i no mester isolá. E último ta e kaso ku hende grandi di edat. Pa mehorá esaki e partido ke drenta bario. “Ta un responsabilidat di nos tur, esaki ta konta pa grandinan i hóbennan: ít takes a village to raise a child’.” Entretantu MAN a entregá un proposishon di lei pa hasi un Penshun General obligatorio.
Segun e kabes di lista tin plaka si, pero tin muchu poko kòntròl, korupshon i no tin konfiansa serka e konsumidó i e invershonistanan. “Si tin konfiansa, sobrá ta bini di mes. Nos mester di stabilidat pa atraé invershonista.”MAN ke krea trabou pa kombatí pobresa i asina laga hende sinti tambe ku nan ta koperá. “Ora tur kos ta lora, di mes kriminalidat lo disparsé. Sufisiente trabou, siguridat i bon enseñansa ta trese mas talento i ménos dropout i hende sin trabou.”
Outor Elisa Koek