Sede di partido Pueblo Soberano - Jose Manuel Dias

Sede di partido Pueblo Soberano – José Manuel Dias

WILLEMSTAD – Sr. Celcio ta un di e soberanonan di promé ora ku a sostené Helmin Wiels for di un prinsipio, inkluso promé ku Wiels a lanta partido Pueblo Soberano na aña 2005. “E idea di Wiels pa bira un pais soberano a apelá hopi riba mi i p’esei ma disidí di djòin e partido mesora”, Celcio ta konta. Promé ku 2005 ya Celcio tabata un fiel siguidó di Helmin Wiels ku e tempu ei tabata militá den partido Niun Paso Atras di Nelson Pierre.

Elekshonnan 2016, Ret Karibense ta presentá e partidonan: Parti 3 Pueblo Soberano

Elekshonnan 2016, Ret Karibense ta presentá e partidonan: Parti 4 Pueblo Soberano

Ta djasabra anochi i manera ta kustumber Pueblo Soberano ta tene su tradishonal enkuentro na su sede kaminda dirigentenan, ministernan i parlamentarionan di e partido ta informá e simpatisadónan riba e último desaroyonan den gobernashon. Por nota ku e asistensha a baha konsiderablemente último añanan i no ta nada kompará ku tempu di Helmin Wiels. Pero Celcio no ta mira esaki komo un problema grandi. “Ounke ku e partido a parti den dos òf tres pida, e soberanonan tei ainda” asina Celcio a bisa.

No a desviá
Pará dilanti di sede di Pueblo Soberano na Palu Blanku Celcio ta deklará ku te ainda e ta rekonosé su mes den e partido. “Mi ta mira ku Pueblo Soberano ta riba e mesun ruta i no a desviá. Tanten ku e partido keda riba e mesun ruta e por sigui konta ku mi sosten.” Celcio enfatisá. E anochi ei direktiva di partido a sorpresá lider polítiko Jaime Cordoba ku desvelo di un bòrchi grandi riba dak di e sede. Riba e bòrchi por mira pòtrèt di Cordoba i difuntu Helmin Wiels.

Ku mira riba un viktoria di Pueblo Soberano den e elekshonnan benidero i kontinuashon di gobièrnu e soberano di promé ora ke pa su partido atendé urgentemente e problemátika di kriminalidat.

Un chèns mas
“Mi tin basta ratu ta warda riba Cordoba, ma bin sede pa buska un yudansa serka dje”, Shani ta konta. E ta mama di dos yu i n’e momentu aki e ta sin trabou. Shani ta haña ku mester duna minister Larmonie di Pueblo Soberano un di dos chèns pa goberná. “E minister ta hasiendo un bon trabou tantu den labor komo den bibienda”. Sra. Davelaar tin tres aña ku Pueblo Soberano i ta hopi kontentu ku e logronan. “Nos tin un hospital nobo na kaminda i kobradónan di ònderstant no mester para den rei mas.”

Outor José Manuel Dias