Jaime Cordoba dirigiendo palabra na soberanonan – José Manuel Dias
WILLEMSTAD – Lider polítiko Jaime Cordoba ta pidi e mas di 19 mil personanan ku a vota pa Pueblo Soberano (PS) durante e último elekshonnan pa sigui kere den e partido. “Komo un partido di ideologia sosial krioyo manera Helmin tabata yam’é nos a kumpli ku tur lokual nos a primintí. Nunka nos no a faya ni ku pueblo di Kòrsou ni ku e pensamentunan di nos lider máksimo Helmin ‘Magno’ Wiels”, asina Cordoba a enfatisá.
Elekshonnan 2016, Ret Karibense ta presentá e partidonan: Parti 4 Pueblo Soberano
Komo ehèmpel Cordoba ta menshoná e lei di enseñansa liber, e lei 80-20 i e resiente oumento di salario mínimo ku 80 sèn pa ora, ku Pueblo Soberano a logra di konkretisá durante su mandato. Pero tin mas kos ku e partido ke logra i p’esei mes ta pidi pueblo su sosten pa por goberná durante kuater aña mas. “Si bo wak riba nos pèchi tin skirbi ‘Curaçao under construction’. Esaki ta nifiká ku ketu bai Kòrsou ta bou di konstrukshon i nos mester di mas tempu pa nos kaba di drecha tur lokual mester drecha” Cordoba a splika.
José Manuel Dias den kòmbersashon ku Jaime Cordoba
Esaki ta e promé elekshon ku Pueblo Soberano ta partisipá na dje sin e figura di Wiels. Despues di a keda kasi 3 aña sin un lider na desèmber 2015 Jaime Cordoba, komo e úniko kandidato, a keda skohé komo e lider polítiko nobo. E lista di Pueblo Soberano pa e elekshonnan benidero ta konsistí di 25 kandidato. Segun Cordoba a laga ‘screen’ tur kandidato pa asina garantisá berdadero soberanonan riba e lista.
Baha lista di espera
Pueblo Soberano ke kaba ku e trabou ku su ministernan a inisiá den entre otro e sektornan di enseñansa i salubridat. Den salubridat por ehèmpel e partido ke logra baha e tempu di espera pa haña un sita serka spesialista na tres siman. Tambe e partido ta boga pa bai bek n’e sistema di dòkternan di bario kaminda e dòkter di kas mester fungi komo un berdadero dòkter di bario.
Ministerio pa hubentut
Banda di finalisá tur e trabounan pendiente e partido ke bini tambe ku inovashonnan na bienestar di hubentut. Un di e inovashonnan ta introdukshon di un ministerio pa hubentut manera ta eksistí na Argentina. E intenshon ta pa den futuro saka tur e asuntunan di hubentut for di e diferente ministerionan i konsentrá esakinan den un solo ministerio kaminda e hóben ta sintié na kas.
Outor José Manuel Dias