WILLEMSTAD – Obreronan di SGTK, e sindikato di trahadó ku ta traha na refineria Isla via kontratista, awe ta wèlga pa di kuater dia tras di otro. Nan ta mas ku fadá di e insiguridat, ku segun nan ta dura añanan kaba. “Ta basta awor, i nos ta sigui mes largu ku mester”, un di e boseronan di e protesta ta bisa.
Ora puntra si nan tin idea di blòkiá e entrada pa trùk di tènk òf awa, nan ta bisa si: “Nos ta kapas di hasi tur kos, ke men tene kuenta ku un bes aki Aqualectra no tin awa mas tampoko.” Na diferente lugá na Kòrsou koriente a bai pasobra Aqualectra pa motibunan di seguridat a sera nan powerplantnan riba e tereno di Isla. Pasobra servisio tékniko di Aqualectra no por subi e tereno.
E refineria a manda un mensahe di prensa ku e trabounan di mantenshon na Isla tin retraso pa motibu di e wèlga. P’esei e refineria ta hañ’é ta kima produkto via e pipanan di huma, loke ta dañino pa medioambiente i ta kousa holó stinki.
Awe tardi 14.00 or e refineria i Antilliaanse Aannemersvereniging (AAV) huntu ku Landsbemiddelaar ta sigui deliberá. Minister Ruthmilda Larmonie-Cecilia di Labor a proponé un temporada di ‘cooling off’, ku lo obligá e trahadónan di bai traha atrobe miéntras ku tin deliberashon. Esnan ta ku welgando ta bisa ku nan no ke esaki.
Outor Elisa Koek