Durante akshonnan aki tambe tabatin tin vários fila na diferente pòmp di gasolin pa motibu di miedu di keda sin gasolin i disel – potrèt: Elisa Koek
WILLEMSTAD – Durante un huisio sumario ku a keda entamá awe mèrdia kontra di e sindikato SGTK, wes a ordená e sindikato pa stòp inmediatamente ku e blokeo di tur entrada i salida di refineria Isla. Esaki na bienestar di interes general pero sin kita e derechi di trahadónan pa manifestá. “Pero e lucha no a kaba akinan i e wèlga ta kontinuá”, un di e manifestantenan a remarká. Algun ora promé tabatin detenshon di tres manifestante durante un disturbio na Pòst 5 kaminda un biaha mas tabatin sendementu di ophetonan na kandela.
Tabata alrededor di mitar di tres di atardi ku un vèn kargá ku efektivonan di ‘Riot Team’ di VKC i un outo di polis tabata zigzag meimei di tur e outonan ku tabata sirkulá riba Schottegatweg Noord direkshon Pòst 5. E motibu tabata un situashon ku a sali for di man i ku tabata rekerí di intervenshon di e unidat mobil spesial aki.
A lòs tiru
Yegando na Pòst 5 outoridatnan a bin topa ku vários artefakto na kandela riba kaminda públiko, loke a rekerí man duru di e Riot Team kontra di e manifestantenan ku a hasi nan mes kulpabel di e aktonan aki. A yega asina leu ku te hasta polis mester lòs tiru di atvertensia den laira pa por kontrolá e situashon na Pòst 5. Durante e disturbionan di awe polis a hasi detenshon di tres manifestante ku no tabata sigui òrdu di outoridatnan.
Esaki a sosodé na momentu ku e dirigentenan tabata reuniendo ku mediadó di gobièrnu i representantenan di e asosashon di kontratistanan (AAV) pa wak si ta yega na un akuerdo i asina pone fin na e wèlga ku a drenta su di kuater dia.
Sin akuerdo
No opstante di entre otro intevenshon di minister di labor, Ruthmilda Larmonie-Cecilia ku te hasta a proponé un periodo di fria kabes, te ainda partidonan no a logra sali for di e impase i ketu bai no tin un akuerdo riba mesa.
Outor Jose Manuel Dias