Jacqueline no sa pa ken otro e lo ke vota – potrèt Elisa Koek

Jacqueline no sa pa ken otro e lo ke vota – potrèt Elisa Koek

WILLEMSTAD – E sede di PNP na Montaña siman pasá a habri festivamente. Miéntras ku diferente kandidato a tira spich, bishitantenan a gosa di sòpi i ta palabra plannan di e partido. “Korupshon nò, akshon sí”, un grupo na un mesa ta bisa. “Esei PNP ta bai hasi.”

Jaqueline ta na e apertura di e edifisio huntu ku su famia i entretantu e konosé mayoria di e kandidatonan. “Mi konosé hopi hende di PNP i mi ta masha satisfecho ku loke nan a logra. Mira kiko ta pasando awor ku nos kamindanan, lus di kaya i kas, tur danki na PNP.”

Infrastruktura ta un punto importante, esei ta sali for di otro reakshonnan tambe. Minister aktual di Tráfiko, Transpòrt i Planifikashon Espasial Suzy Camelia-Römer ta favorito serka hopi hende. “E ta e úniko ku a trata konstrukshon ilegal di bèrdè mes”, Melvin di 40 aña ta bisa. “For di tempu ku mi por kòrda tur hende tabata hasi kiko ku ta, pero awor ku ta na Suzy, di bèrdat tin mantenshon. E ta hasi bon trabou i e ta traha duru.”

Lider di partido Davelaar tambe tin hopi partidario. Hopi hende konos’é desena di aña kaba i ta trat’e na un manera familiar. “Semper e tabata un hòmber di pueblo”, Milena ta bisa. “Bo ta ripará awor tambe: E no ta papia nèchi so ku propaganda, e ta traha duru. Ta esei nos mester.”

No tin skandal
Un otro punto importante ku tur hende ta di akuerdo kuné ta korupshon. “E partido den setenta aña nunka no tabata envolví den un skandal”, Melvin ta sigui. No ta plama odio, no tin korupshon òf otro kos straño. Nan ta traha pa pueblo i nos ta ripará. Nan ta traha di nos plaka di belasten.”

Outor Elisa Koek