Suzy Camelia-Römer, number dos riba lista di PNP – potrèt: Elisa Koek

Suzy Camelia-Römer, number dos riba lista di PNP – potrèt: Elisa Koek

WILLEMSTAD – Na aprel di aña 1948 Moises Frumencio da Costa Gomez a lanta Partido Nashonal di Pueblo, PNP. Promé ku esei e tabata forma parti di Katholieke Volkspartij (KVP) pero e tabata haña ku e partido aki tabata muchu liá na misa. PNP tambe a bira un partido kristian, pero ku un base sosial-demokrátiko.

Na 2016 Humphrey Davelaar ta pará te ariba di lista di PNP, siguí pa èks promé minister Suzanne (Suzy) Camelia-Römer. E partido ta pone ‘Hende’ sentral: hende ta pará sentral i for di e punto ei ta regla asuntu manera ekonomia, hustisia i bon gobernashon.

Suzy Camelia Römer ta papia ku Elisa Koek

Elemento ku por duna hende un mihó bida segun Camelia-Römer ta kuminsá serka ekonomia, esaki ta hasi bon enseñansa i previshonnan sosial posibel. E besindario tambe ta importante: famia, bario i seguridat. “Ta p’ései nos no ta traha na kamindanan grandi so, pero tambe na hanchi chikí i kaya mei mei den un bario. Nos ta traha plenchi i nos ta krea un infrastruktura ku ta duna habitantenan oportunidat. Pa loke ta seguridat, nos ta preferá prevení riba remediá.”

Huntu
Un rekisitu pa un komunidat ku ta kana bon pa e number dos riba lista ta un bon gobernashon. Asina so un pais por bai dilanti. “Un bon gobièrnu, transparente, ta duna Hende siguridat i konfiansa. Ademas por pensa padilanti: pa medio di diálogo nos por sigui konstruí huntu.” Ku esaki Camelia-Römer mésora ta menta e lema di su partido ‘Huntu nos por’.

Lider di partido Humphrey Davelaar ta primintí ku e lo keda traha sòpi pa pueblo – potrèt Elisa Koek

Lider di partido Humphrey Davelaar ta primintí ku e lo keda traha sòpi pa pueblo – potrèt Elisa Koek

Durabilidat
PNP mes tambe a kuminsá pensa padilanti. Komo partido nan ta spera di desaroyá Kòrsou mas aleu den e área di durabilidat i IT. Durabilidat pa medio di produsí mas tantu bo mes i trese asuntunan agrario bèk. “Nos ke krea un industria di ‘wellness’ tantu pa nos mes komo pa e turista. Piska nos mes piská, krese berdura i atrakshonnan turístiko manera ‘eco lodge’of biahe.

Smart nation
Pa loke ta IT Camelia-Römer ta boga pa un ‘smart nation’: digitalisashon di prosesonan i oumento di e konekshonnan. “E-government, un pasaporte elektróniko pa kuido, un chipknip pa bùs i sistemanan ku ta komuniká ku otro”, e ta menta komo ehèmpel.

Camelia-Römer ta enfatisá ku e kabelnan i konekshonnan nesesario ta na nan lugá kaba pa hasi di Kòrsou un sentro di konosementu progresivo. “I no pa e isla so, sino pa henter e region, pasobra no tin frontera mas.”

Outor Elisa Koek