Ziko nase Tyzik Lispier
WILLEMSTAD: Pa konkluí e seri di potrètnan musikal urbano, Ret Karibense ta kòmbersá ku e artista Ziko, mihó konosí komo Tyzik Lispier, un hóben kantante ku a hasí su debut artístiko mas ku 10 aña pasa den e popular programa di talento Curastars. Resientemente Ziko a djòin e banda popular NSTYPLY, kende ta hasiendo furor bou di e komunidat Antiano na Hulanda.
Banda di ta un talentoso kantante, Ziko ta kreando su nòmber komo produktor i areglista den e genero urbano na Hulanda. Tambe Ret Karibense a kòmbersá ku su tata, Elton Lispier, kende a ekspresá kon orguyoso e ta pa mira kon Ziko ta siguiendo su pashon musikal.
Curastars
Fo’i den Curastars por a nota Ziko su ‘alma bieu’, unda ela impreshoná pueblo di Kòrsou ku su redenshonnan di George Benson i Marvin Gaye. Akí e hóben a logra klasifiká komo di dos finalista den e kompetensia. “Na kas tabata músika internashonal tabata toka, pues na un edat hóben Tyzik a keda eksponé na esaki”, su tata Elton Lispier ta konta.
Ziko, Cizzle,TSeaN di NSTYPLY
Elton mes ta un konosido músiko i kantante, ku te ainda ta deleita turistanan na varios hotel popular. Tambe tata i yu a presenta kasi dies aña largu komo e duo ‘The Difference”. “Despues ku Tyzik a bai Hulanda i mi mester a presenta pa promé biaha mi so, tabata hopi duru. Mi a sinti un bashí”, Elton a atmití.
Kombiná
Na 2008, Tyzik a kontinuá su estudio na Hulanda, unda ela optené un Maestría den Atministrashon di Empresa, Strategia i Inovashon. “Kombiná skol ku músika no ta difísil, basta bo plania bo dia i pone prioridat nan dilanti”, Ziko a splika. “Ora mi a ripara ku mi ta stress un tiki ora mi ta preparando p’ami eksámen, mi ta tumá un break i bai traha un beat”, e kantante kontinuá.
Pronto Ziko a kuminsá kapta atenshon di varios produktor di artistanan fama, unda na 2014, ela haña e oportunidat pa traha ku e kompositor di e kantika ‘Cheers (Drink To That)’ di Rihanna. “E produktor tabata hopi impreshoná ku mi areglonan. Esaki tabata un gran motivashon”, Ziko a kompartí. Den 2016 Ziko no a para ketu i ta trahando riba diferente produkshon ku artistanan di Hulanda i tambe internashonal.
Wolfgang, Ziko, Boef riba set di DISCOTHEEK
Resientemente Ziko a produsí e kantika ‘DISCOTHEEK’ ku DJ WOLFGANG, i alabes ela kanta ku e raperonan BOEF, ISMO i KEIZER. E aña akí, huntu ku e agrupashon NSTYPLY, ku kua e tin sigur 2 pa 5 presentashon na Kòrsou pa aña, Ziko a saka un hit titula, ‘TE AHINDA’. E delaster vershon ku Ziko a saka komo solista ta ‘KOM BIJ MIJ’ ku IR-SAIS i SHANS. “Mi músika lo bai krusa fronteranan ku hopi hende lo no a spera”, e kantante a afirma.
Ritmo Karibense
Ziko ta konsiente ku e esena di Hip Hop/Urbano Hulandes ta kambia hopi lihé. “Aworakí e ritmo Karibense ta hungando un rol hopi grandi”, Ziko a splika. Según Ziko, dos pa tres aña pasa tabata hopi difísil pa por a yegá radionan nashonal ku un kantika urbano. “Tiki tiki e portanan ta habriendo kaminda tur tipo di artista por lusi”, Ziko a konkluí.
“Mi raisnan krioyo tin hopi influensia riba mi… Mi ta ripara esaki hopi den mi abilidat komo produktor, unda mi por traha di un ritmo kombiná te ku EDM i Deep House”, ela splika. Ku e variedat akí, Ziko ta reta su mes den diferente merkado di músika.
Outor Deya Mensche