Charles Cooper – potrèt: Deya Mensche
WILLEMSTAD – A kana bario di Seri Domi ku e tim dinámiko di partido PAS of Patriótiko Adelanto Sosial, i nan lider Charles Cooper, kende a splika nan vishon pa un mihó Kòrsou i tende pensamentu di pueblo.Partido PAS a keda funda dia 6 di yüli, 2016 despues di un dramátiko éksodo dor di 22 miembro for di partido MAN. Cooper i su grupo tabata malkontentu kon e direktiva di MAN supuestamente tabata manipula diferente asuntu, kual a pone ku nan no por a biba ku e direkshon ku e partido ta bayendo.
Elekshonnan 2016, Ret Karibense ta presentá e partidonan: Parti 5 PAS
Según Cooper, partido PAS tin aproksimadamente 24 kofundadó, ku ta konsistí di entre otro Urvin Macaay, Dwigno Puriel, Efi van der Meent, Papito Curiel i Vanessa Elisa. Apesar di a bandoná MAN, Cooper a splika ku nan no lo desviá fo’i e ideologia sosial demókrata, unda prinsipionan manera libertat, dignidat humano, solidaridat, i hustisia sosial ta para sentral. Pasobra tin tantu partido ta partisipando den e elekshon akí, i práktikamente tur kolo a kaba, PAS a hañ’e ta skohe e kolo oro, ku representa pas i puresa.
Charles Cooper ta papia Deya Mensche
Siguridat
Según e enkuesta ku PAS a hasi, siguridat a sali komo un tópiko di sumo importansia pa traha riba dje, unda e komunidat ke trankilidat den su kas i bario. Tambe Cooper a splika ku bou di su gobernashon lo implementa e plan di turismo, ku a keda aprobá kaba pa parlamento. Tambe Cooper ke introdusí impuesto riba apartamentunan, ku ainda no ta pagando i ku si ta probechá di merkadeo di CTB i CHATA i ta kreá kompetensia inhustu kontra e hotelnan. Finalmente, partido PAS ke revisa 20 pa 30 porshento di e EOP, pasobra esaki ta limita desaroyo i muchu terenonan priva ta keda asigna komo área di naturalesa.
Tambe Cooper a splika ku kresementu di nos ekonomia i oumento di kupo di trabou ta di sumo importansia. “E pueblo ke un kambio, unda realmente algu otro ta bai pasa”, ela splika. Durante e debate di e klup di ekonomistanan, partido PAS a propone pa elimina e sistema di impuesto ku ta kreá e burokrasia, ku según Cooper, ta perhudika kresementu ekonómiko. Cooper ta splika ku nan lo kategorisá tur kompania i kobra un tarifa fiho di impuesto, ku tur komersiante tin di paga.
Gobièrnu tin un presupuesto di 2 bion florin pa aña, i ku e sistema di impuesto ambisioso di Cooper, lo genera 1.63 bion florin pa e kaha, ku ta kasi 80 porshento di e presupuesto. “E komersiante ta fada di paga tantu tipo di impuesto ku ta rekerí asina un atministrashon pa regula, i ta purba di minimalisá su ganashi pa asina nèk gobièrnu”, Cooper a splika.
Partido PAS kanando bario
Produktividat
Según Cooper, e sobra 20 porshento lo keda genera serka trahadónan ku ta paga impuesto di entrada i otro impuesto di atministrashon manera na DROV i otro instansia. “Te ainda mi no a haña ni un komersiante ku no a aplaudí e sistema di impuesto akí i ta mira e tarifa komo un insentivá pa hisa su produktividat”, Cooper a konkluí.
Outor Deya Mensche