Simpatisante Lucette Meriana
WILLEMSTAD – Pa e elekshon benidero, Ret Karibense ta hasiendo un sondeo bou di tur partidó, unda ta kòmbersá ku e simpatisantenan riba nan motibu dikon nan ta vota pa e respektivo partido. Durante e kanamentu di bario di partido PAS of Patriótiko Adelanto Sosial, enkabesá pa Charles Cooper, a kòmbersá ku varios votado di e partido oro, ku ta sostené e ideanan ambisioso di e partido hóben akí.
Elekshonnan 2016, Ret Karibense ta presentá e partidonan: Parti 5 PAS
Según Angela Crozier, habitante di Seri domi, kriminalidat ta un problema grandi ku mester keda atendé, i e partido ta primintí di trese pas den nos komunidat. Simpatisante Lucette Meriana ku su paki di flyer den su man, ke mira un kambio pa Kòrsou. “E gobièrnu aktual tin di baha pa otro sinta i asina bini un mihó solushon”, ela deklará. Adishonalmente Meriana ke pa partido PAS kreá mas kupo di trabou pa tur e hóbennan ku aktualmente ta desemplea, i tambe e ta spera ku pueblo lo haña mas kas pa biba aden.
Speransa
E hóben Ingemee Pieternella di 19 aña, ta vota pa promé biaha den e elekshon akí i ta hinka su speransa den e partido. E ta kere ku nan por drecha e situashon di desempleo bou di hóbennan dor di i kreá más trabou i asina amplia oportunidat. Tambe su mama Inegma Pieternella ta riba lista komo kandidato 21, i e ta hopi orguyoso pa mir’e tuma e kurashi di subi un lista. “E ta un eksperensia nobo pa na tur dos i asina mi ta siñando hopi di polítika”, ela splika.
Meliana Profar, Ronald Pieternella i Ingemee Pieternella – potrèt: Deya Mensche
Ronald Pieternella, tambe ta preokupá pa e montante di desempleo ku tin aktualmente bou di hóben. “Por kombatí pobresa solamente ku empleo, anto si bo no reaktiva e ekonomia, nos lo keda den un sírkulo visioso”, ela splika. Tambe e ta di opinion ku e partidonan tradishonal no a solushoná e problema, i p’esei mester bini un partido nobo, ku hende kapasitá i eksperensia pa drecha e situashon.
Sosial
Richinel Martina di su parti, ta kere den e filosofia sosial demókrata di PAS, paso según Martina, Kòrsou mester di un partido ku un ala sosial pa drecha e situashon aktual. E ta preokupá pa e kantidat de hende pober ku mester di ayudo agudo. Señora Meliana Profar no ke pa niun partido kana parti kos pa hende vota.” Mester wak e situashon i ekonomia i determina kon ta bai dilanti”, ela finalisá.
Outor Deya Mensche