Jenny no ke warda i ke opera awor – potrèt: José Manuel Dias
WILLEMSTAD – Jenny tabata planiá pa operá dia 17 di ougùstùs último di un ‘buikwand breuk’ na hòspital St. Elisabeth (SEHOS) pero e operashon a keda kanselá. “Mi maleta tabata kla poné pa bai hospital pero na último ora a informámi ku mi no por operá mas”, Jenny ta lamentá. Esaki tabata un di e tantísimo operashonnan ku SEHOS a para pa motibu di falta di sufisiente material di operashon. Entretantu a pasa kasi un luna pero te ainda Jenny no sa ni ki dia ni na unda e ta bai operá.
Den kaso di operashon no ta SEHOS ta pone fecha pero e siruhanonan. Tur biaha ku Jenny a purba di haña un klaridat serka su siruhano e ta bin tende di e asistente ku e spesialista ta pendiente di un kontesta di SEHOS i ku despues e lo yama pa informá e pashènt. Echo ta ku e yamada nunka a drenta i ketu bai e pashènt ta wardando riba un fecha nobo pa operá. Tampoko e pashènt no a keda informá di e posibilidatnan pa bai operá den eksterior.
Komplikashonnan
E situashon aki tin Jenny di 47 aña di edat bastante preokupá pasobra mas e tarda pa operá mas chèns tin pa komplikashonnan presentá. Un di e komplikashonnan ku lo por surgi si no hasi nada ku e ‘breuk’ ta ku e tripa por keda di klèm. Ya kaba e ta nota ku e ‘breuk’ ta birando mas grandi i ta teme ku ta bira mas difísil pa poné esaki bèk na su lugá. ‘Mi no por wanta ni un dia mas, mi ke operá aki i awor’, Jenny a enfatisá. E ta preferá di keda operá na Kòrsou pero si e mester bai den eksterior e ta skohe pa Hulanda i no Colombia.
Pero tin mas kos ku ta afektá Jenny su bida komo konsekuensia di kanselashon di su operashon. Un di nan ta e mobilidat físiko. Segun tempu ta pasa esaki ta bira ménos i e lo no por hasi tur kos mas. “Ya kaba e ‘breuk’ ta strobami di yega na mi pianan i mi kurpa ta kansa hopi lihé” Jenny ta remarká.
Trabou na peliger
E kanselashon di operashon i e insertidumbre ku ta reina rondó di esaki ta afektá su trabou tambe i te hasta ta pone esaki na peliger. E echo ku Jenny ta riba kontrakt kombiná ku e echo ku e ta bira malu ku hopi regularidat ta hasi su situashon laboral hopi vulnerabel, kaminda e empresa fásilmente por disidí ku no ta renová su kontrakt mas. Segun e pashènt lo ta hopi piká si e mester pèrdè su trabou pa motibu ku e no por haña un fecha pa e por operá mas pronto posibel.
Pero no ta promé bes ku SEHOS ta kanselá operashonnan pa motibu di falta di sufisiente material den sala di operashon. Segun Jenny na 2013 tambe tabatin un situashon similar kaminda a kanselá su promé operashon di ‘breuk’.
Outor José Manuel Dias