E públiko ta balia espontaneamente riba e ritmo i melodia di kantikanan bieu pa mucha - potrèt: Janita Monna

E públiko ta balia espontaneamente riba e ritmo i melodia di kantikanan bieu pa mucha – potrèt: Janita Monna

KRALENDIJK – Boneiru a selebrá Dia di Bandera, Dia di Boneiru, awe. Aparte di tabata un tempu pa fiesta, tabata tambe un tempu pa para ketu na e morto di e agente polisial Ferry Bakx.

Rincón, e kuna di kultura boneriano, ta e sitio di ekselensia pa selebrá e Dia di Bandera akí. Pasobra el a haña komo tema: ‘Rèspèt pa pasado ku bista pa futuro’. Dignatarionan boneriano i tantu polítiko- komo mandatarionan di islanan ruman a bini huntu riba e plenchi yen di ambiente dilanti e kas pa ansiano Cocari. E interes públiko tambe ta grandi.

Sintimentu miksto
Gezaghebber interino Evelina Betancourt-Anthony ta para ketu na e héroenan di pasado, na nan ku a hasi e isla grandi. Tòg e no por pasa e aktualidat por alto: “Mi ta pará akinan ku sintimentu miksto tambe. Pasobra loke a sosodé tres siman pasá, niun hende por a imaginá nan mes.” Betancourt-Anthony ta referí na e morto di e polis Ferry Bakx. “Pero si tin algu positivo ku a sali di esaki, ta e union ku e komunidat a radia despues di e suseso akí: su koló no tabata konta. E tabata un di nos.”

Hisamentu di e bandera di Boneiru - potrèt: Janita Monna

Hisamentu di e bandera di Boneiru – potrèt: Janita Monna

Por a sinti e union ei mas tempran durante e mainta tambe, ora a tene un reunion speshal di Konseho Insular den e Pasangrahan na Kralendijk pa Dia di Boneiru. Dos aña pasá a kritiká gezaghebber Edison Rijna ku el a ekskluí un parti di e poblashon ku su gritu ‘100 porshento Boneriano’. Awe e miembronan di Konseho Insular ta enfatisá den nan diskursonan kòrtiku ku e Dia di Bandera ta pa ‘tur ku ta sinti nan mes Boneriano’ i pa ‘tur ku ta karga Boneiru den su kurason’.

Na Rincon Betancourt-Anthony ta mustra di tin bista pa e kambionan den e komunidat boneriano: “E isla akí a pasa den desaroyonan grandi e último añanan. Algun hende tin miedu ku, ku e binida di diferente kultura, e kultura propio lo disparsé. Ami ta kere ku esaki ta hasi nos kultura mas riku, mas dinámiko. Nos por siña di otronan i nan di nos. Laga nos keda habrí pa tur hende ku ta di bon boluntat, pa tur hende ku ke aportá na e futuro di e isla.”

Diputado Nina den Heyer di Kultura ta uni su mes na esaki. “Globalisashon i desaroyonan teknológiko ta pone nos identidat propio bou di preshon, de bes en kuando. Hustamente p’ esei ta asina importante pa konosé nos historia. Pero laga nos no keda pegá den pasado, laga nos siña di dje i sigui traha pa futuro.”

Miembro di Konseho Insular Esther Bernabela - potrèt: Janita Monna

Miembro di Konseho Insular Esther Bernabela – potrèt: Janita Monna

Sintimentu di union
“Si, tin un otro atmósfera ta kologá riba e isla”, e miembro di Konseho Insular Esther Bernabela tambe ta bisa, ora e pari protokolario a tèrminá. Despues ku e hendenan a balia espontaneamente riba ritmo i melodia di kantika di mucha bieu, ora e adultonan a kaba di hunga ku e yoyonan ku e organisashon a parti. “Despues di e krimen horibel, ma sintié awe pa di promé biaha. Un sintimentu di union.”

Outor Janita Monna