Minister di Defensa Jeanine Hennis-Plasschaert
DEN HAAG – Tweede Kamer tabata unánime durante e debate riba Wardakosta Teritorio Karibense pa tapa e burakunan den e presupuesto di forma struktural. Dor di diferenshanan den tasa di kambio a surgi un defisit presupuestario di 3,25 mion euro den 2015.
Ministerio di Asuntunan Interno i Relashonnan di Reino a kompensá esaki parsialmente, pero Wardakosta mes mester a ekonomisá 650.000 euro aserka.
Pa e motibu akí Defensa ta ekonomisá riba, entre otro, e kontinuashon di investigashonnan di integridat. “Wardakosta ta temporalmente menos kapas pa nombra e riesgunan den su prosesonan interno”, minister Jeanine Hennis-Plasschaert a atmití kaba den yüni.
Anteriormente Hennis-Plaschaert a duna di konosé ku e medidanan pa ekonomisá no ta afektá Wardakosta e aña akí. Si e diferenshanan den tasa di kambio bira mas desfaborabel, entre otro e kantidat di dia di nabegashon di Wardakosta lo kore peliger. Den su karta pa Tweede Kamer e palabra ‘re-dimensioná’ – establesementu di tarea i responsabilidat di nobo – ta kai.
Venezuela
Esei ta sla den due serka diferente miembro di Tweede Kamer, sigur mirando e turbulenshanan ku tin na Venezuela. Wardakosta ta sinti su preshon di trabou subi pa motibu di venezolanonan ku ta krusa laman bai e islanan sotavento serkano. Raymond Knops (CDA): E kabinete ta naïf i no ta tuma medidanan trankilisante. Esei ta inakseptabel i intolerabel.”
“No por ta ku ta e balor di e dòler ta determiná e tamaño di e organisashon, mientras ku e tareanan ta ankrá de e Konstitushon. Esei ta un mundu robes pa drechi”, e miembro di Tweede Kamer Angelien Eijsink (PvdA) ta bisa.
E minister ta ripití ku ta ehekutá patruyagenan adishonal pa kontra-arestá imigrashon ilegal for di Venezuela. Segun e, no tin fluhonan grandi di migrashon ta formando tampoko for di e pais sur-amerikano bisiña.
Prinsjesdag
E minister ta haña ku e preokupashon ta hustifiká i ku ta apsolutamente indeseabel pa e défisit bira struktural. E no ta primintí nada, por parte pasobra Wardakosta ta kai bou di e presupuesto di Asuntunan Interno i Relashonnan di Reino. “Meskos ku boso mi tambe ke mashá pa solushoná esaki, pues boso warda un ratu riba Prinsjesdag.”
Outor Pieter Hofmann