Mr. Marije Vaders – potrèt: Dick Drayer
WILLEMSTAD – Por lo pronto lo no tin un tratamentu di kontenido den e kaso kontra Burney ‘Nini’ Fonseca. Esei tabata e resultado di e di dos seshon preparativo awe mainta. E motibunan ta e interogashon di dos testigu anónimo i e agènda yen di Korte mes.
Ta sospechá Fonseca di ta e konekshon entre e ehekutornan i esnan ku a duna òrdu pa asesiná Helmin Wiels, riba 5 di mei 2013. Aktualmente e ta den prizòn na Hulanda despues di un sentensia den un kaso di droga i labamentu di plaka, pasobra na Kòrsou su bida ta kore peliger – te asta den prizòn.
Testigu anónimo
Ministerio Públiko ke tende testigunan D5 i C3. Nan lo por duna deklarashonnan ku ta sugerí kulpabilidat di Fonseca. Defensa ke ta aserka, pero esei e Prokuradó General, mr. Gert Rip, no ke. E ta bisa ku e riesgu ku defensa lo haña sa e identidat di e testigunan D5 i C3 ta muchu grandi i ku nan bida lo kore peliger si nan identidat bira konosí.
Abogado Marije Vaders, kende ta defendé Fonseca, ke tin e posibilidat pa reakshoná mesora riba kontestanan durante e interogashon. “Lunanan por pasa, si atendé esaki por eskrito. Bo ta haña kontesta na kua bo no tin nada komo defensa. Mi mester por reakshoná mesora ku kontra-pregunta. Sigur ora ta trata di testigu anónimo, defensa mester por chèk e konfiabilidat di e deklarashonnan.”
Wes mr. Maria Paulides ta rekonosé e interes di e defensa, pero e ta laga e wes-komisario mes tuma un desishon riba esaki. Vaders tabata kontentu ku Paulides a duna un proposishon: e defensa por ta presente den un espasio tapá i lo por pasa dor di e kontestanan inmediatamente despues di e interogashon, pa por hasi pregunta nobo mesora.
YouTube
Durante e seshon, e Prokuradó General a referí implisitamente na dokumentunan di e dossier di e kaso akí, ku a bin resultá riba kaya via YouTube. Esaki a revelá ku eks-minister di Hustisia Elmer ‘Kadè’ Wilsoe ta un sospechoso den e kaso akí.
E defensa ke e grabashonnan di e interogashonnan di otro testigu nobo den e kaso akí. “Mi a bisa kaba den mi karta ku mi no ke mustra ku niun dede akusativo, pero ku, si suminstrá e grabashonnan ei, tin chèns ku nan ta bai resultá riba YouTube”, Rip a reakshoná.
Dos luna
Asina ku finalisá e interogashon di e testigunan nobo i haña un buraku pa henter un dia di seshon den korte, lo determiná un fecha pa e tratamentu riba kontenido. Esei lo ta minimalmente dos luna despues. Vaders a pide e lapso di tempu ei, pa e tin tempu ámplio pa konsultá ku su kliente tokante e eventual informashon nobo, disponibel e ora ei.
Outor Dick Drayer