Esnan ku ta vota pa PAIS ta bisa ku e partido ta skucha kiko ta nan idea- i problemanan – potrèt: Elisa Koek
WILLEMSTAD – For di tempran gruponan di mucha, hóben i adulto tabata pará kla pa bin den moveshon djadumingu. E númber 3 riba lista di PAIS, Eugène Cleopa, a orgaisá un torneo di fútbòl riba e tereno pa deporte di Sambil. A pesar di awaseru e evento a hala hopi mirones bou di e simpatisantenan di e partido polítiko. “Nos ta sostené Eugène i naturalmente PAIS. Esaki ta un partido ku realmente ta skucha nos i ku no tin miedu pa tuma desishonnan difísil”, Tiffany di 27 aña di edat ta bisa.
Elekshonnan 2016, Ret Karibense ta presentá e partidonan: Parti 7 PAIS
E otronan presente ta di akuerdo kuné. “PAIS ta hasi algu pa e pueblo i ta purba saka nos for di krisis. Klaro ku no ta tur kos ta logra semper, pero realmente nan ta pensa huntu ku tur hende”, Gonzalo di 59 aña ta añadí. Don Hernandez (50 aña) tabata envolví ku e partido for di su inisio, pero awor numa el a pone su mes eligibel. “Mi konosé Alex for di mucha i semper mi a para su tras. Integridat i kapasidat ta pas kuné i ku PAIS. Despues di a yuda pa añanan largu tras di kòrtina, mi a disidí di bini dilanti.”
Asina tin mas hende ku ta hunga un ròl patras, for di visibilidat, serka PAIS – a lo menos, e sintimentu ei tin, pasobra segun nan ta skucha tur idea i konseho di e pueblo. “Bo por konta semper ku Eugène”, Angelo di 37 aña ta bisa. “E ta aksesibel i tin atenshon pa idea di otronan. Pa ami no tin niun otro partido ku ta yega ni serka di esei.”
Kere den e Yu di Kòrsou
Anthony tambe tin e sintimentu ku PAIS ta skucha e pueblo i tin konfiansa den dje komo Yu di Kòrsou. “Mi a biba hopi tempu na Hulanda i mi ta tin e bon, pero a bira tempu pa bini mi pais. Mi ta kere den e Yu di Kòrsou i tin e idea ku PAIS ta kompartí e pensamentu ei.”
Willet, di 41 aña di edat, ta bisa ku hopi miembro di PAIS gusta konsultá ku públiko. “Ta un partido ku ta skucha ta kiko e pueblo mester di dje i ku ta kombertí esei den akshon. Nan ta e únikonan ku efektivamente a introdusí hopi lei.” Su bisiña Frans ta komplementá: “PAIS ta e úniko partido ku mi ta konfia e futuro di mi yu kuné.
Outor Elisa Koek