Miembro di Parlamento Desiree de Sousa-Croes – potrèt: Ariën Rasmijn
ORANJESTAD – Ku e mayoria mínimo di djesun voto Parlamento Arubano a aprobá un amienda ku ta hasi relashon di pareha registrá posibel riba e isla. Ku esaki parehanan di e mesun sekso por formalisá nan relashon ku introdukshon di e Kódigo Sivil di Aruba nobo.
Ta trata di un amienda konhunto ku tur frakshon a formulá komo adishon na e Kódigo nobo. Awe a debatí riba esaki. A formulá e amienda awe numa, despues ku na último ora – pa motibu di desakuerdo – a rechasá un Nota di Kambio, den kua tabata regla relashon di pareha registrá. Den e nota tabatin un klóusula ku tabata hasi relashon di pareha registrá hurídikamente igual na matrimonio.
Formulashon
Fundacion Igualdad a formulá e Nota di Kambio, ku tabata gosa di e sosten di un mayoria di Miembro di Parlamento den tres di e kuater frakshonnan. Miembro di Parlamento Desiree de Sousa-Croes, kende tabata esun ku a tuma inisiativa pa e promé amienda pa relashon di pareha registrá, a kita su sosten di e nota. Esaki a pone ku e sosten den su frakshon, ku tabata delikado kaba, a bin tambaliá. De Sousa-Croes no tabata di akuerdo ku e formulashon den e aklarashon di e nota ni tampoko ku e echo ku minister di Hustisia tabatin e intenshon pa laga Konseho di Konsulta opiná promé riba e nota.
E polítiko ta deklará ku tòg ya no tabatin konsenso mas riba e nota di kambio. Puntrá tokante esaki, Arlene Schipper, ku ta miembro di direktiva di Fundacion Igualdad, ta bisa ku ‘debidamente kasi tabatin un konsenso pa e relashon di pareha registrá, ku tabata drumi kla kaba riba eskritorio di minister di Hustisia’. E minister di Hustisia a ofresé e nota, ku no a haña aprobashon, simbolikamente na Presidente di Parlamento ku e partisipashon ku ‘hopi partido a traha huntu na dje’.
Klóusula
Spesifikamente e frakshon di PDR no a gusta e klóusula. Segun líder di frakshon Andin Bikker e klóusula tabata innesesario ya ku e konsekuensianan hurídiko di e Kódigo Sivil di Aruba ya ta stipulá den e ordenansa di ehekushon. Banda di esei, Bikker ‘hamas a mira un klóusula di e tipo ei den e forma ei’ i Konseho di Konsulta no a investigué tampoko. Finalmente Bikker ta mustra riba e resistensha serka ‘un gran parti di e poblashon’ ku ta kontra e idea ku un relashon di pareha registrá lo ta igual na un matrimonio.
Despues ku e nota di kambio a pega, tur frakshon a purba pa ainda yega na pasamentu di relashon di pareha registrá. Pa yega na un konsenso ku sufisiente voto na fabor, a disidí di laga e klóusula rekoré un ‘fase transitorio’. No a aseptá un moshon pa apliká un lei di introdukshon aselerá pa e fase transitorio akí.
Diferente Miembro di Parlamento a vota kontra e amienda – for di konsiderashonnan religioso – i tres miembro di e partido di oposishon MEP a bandoná sala mientras ku nan líder di partido Evelyn Wever-Croes a vota a fabor di e amienda. Desiree de Sousa-Croes ta lamentá ku a basha awa den biña pa yega na e votashon akí. E lo a preferá di vota pa matrimonio di homoseksual.
Aplouso
E públiko riba tribuna, ku por gran parte tabata konsistí di miembronan di e komunidat LGBT, a risibí e resultado di e votashon ku fuerte aplouso. Ku aseptashon di e amienda, matrimono na Aruba te ainda ta keda un asuntu estriktamente entre hòmber i muhé.
Outor Ariën Rasmijn