Simpatisant Myra Biegelaar – potrèt: Deya Mensche
WILLEMSTAD – Pa e elekshon benidero, Ret Karibense ta hasiendo un sondeo bou di tur partidó, unda ta kòmbersá ku e simpatisantenan riba e motibu dikon nan lo vota pa e respektivo partido. Durante e debate polítiko organisá pa CHATA i CTB, a kòmbersá ku prospekto votadonan di partido Demokrat, ku ta sostené e ideanan sosial di e partido.
Elekshonnan 2016, Ret Karibense ta presentá e partidonan: Parti 8 Partido Democraat
Enkabesá pa Geraldine Scheperboer-Parris, Partido Democraat ta partisipá den elekshon despues di basta tempu, i ta marka historia ku un lista di 26 hende muhé vishonario. Esaki sigur ta inspira Myra Biegelaar, ku ta di opinion ku hende muhé ta pensa mas sosial, i ta traha mas duru ku hopi hende hòmber na Kòrsou. “E ta algu spesial, paso según mi ta úniko kaminda na mundu ku tin un partido di hende muhé so”, ela splika.
Nasya-Marie Mercera – potrèt: Deya Mensche
Según Nasya-Marie Mercera, kende tambe a asistí e debate polítiko i ta haña un partido di hende muhé algu positivo, no mester lubidá e balansa den gobernashon. “Nos mester traha huntu i ta importante pa tin un balansa”, ela splika. Pa Biegelaar, ta importante pa e nesesidatnan di bario bini mas mihó dilanti, paso esaki ta kurason di e hendenan. “E mandatarionan mester skucha e habitantenan mas mihó, pa asina drecha e barionan”, Biegelaar a splika.
Tambe Biegelaar ta haña ta hopi importante ku e partido ke modernisá edukashon i hasí esaki na papiamentu i na inglés, un idioma ku ta ser papia rònt mundu. Mercera tambe ta sostené e introdukshon di ingles den e plan di modernisashon i ta haña e tópiko akí hopi importante, pero según e hóben mester plania e finansiamentu di esaki bon. “Nos nivel di edukashon i nos skolnan mester keda mehorá”, e hóben a enfatisá. “Mester kòrda riba e hendenan menos pudiente ku tambe mester manda nan yunan skol i no tin e rekursonan básiko. E edifisionan mester ta den bon estado i e muchanan mester ta den un ambiente sano pa nan por konsentrá i presta”, Mercera a splika.
Tambe turismo ta algu ku Mercera ke mira partido Democraat traha riba dje. “Pero según mi ta edukashon ta e yabi, pa asina traha riba otro área importante manera ekonomia i turismo”, Mercera a finalisá.
Outor Deya Mensche