Geraldine Scheperboer-Parris – potrèt: Deya Mensche
WILLEMSTAD – Falta tres siman mas pa e elekshon kontensioso di parlamento di Kòrsou, i Ret Karibense ta kòmbersando ku diferente lider di partido pa komprondé su vishon di gobernashon. A bishitá e sede di Partido Demokrat, na ofisina di Parris & Scheperboer, unda a kòmbersá ku e dinámiko lider Geraldine Scheperboer-Parris, kende a splika nan vishon unda prinsipionan sosial ta para sentral.
Elekshonnan 2016, Ret Karibense ta presentá e partidonan: Parti 8 Partido Demokrat
E partido sosial demókrata, kende no a partisipá den varios elekshon anterior, mester a reinventa nan strategia i bin bèk ku un mensahe i perspektiva nobo. E partido kòrá, ku a kaba di selebrá 72 aña di eksistensia, ta gosa di un historia i legasia ekstenso, i a haña un segundo bida den e promé lider polítiko femenino, abogado Geraldine Scheperboer-Parris. Pa promé biaha den historia, partido Demokrat ta bai elekshon ku un lista ku ta konsistí solamente di hende muhé.
Agenda sosial
“Partido Demokrat tin raisnan hopi profundo na Kòrsou i por ser konsiderá un instituto”, Scheperboer-Parris a splika. Loke a atraé spesífikamente na Scheperboer-Parris ta e agenda sosial di partido Demokrat, unda a introdusí leinan laboral i sosial ku ta vigente te ku dia di awe.
“Bo mester sa ku tur hende tin karakterístika spesífiko, i hende muhé no ta diferente, i si bo sa kiko esaki ta, bo ta prepara bo mes pa bo por maneh’e. Na final di dia bo tin di wak bo meta pa bo no keda sin alkansá e propósito final ku tur hende mester tin”, Scheperboer-Parris a splika.
Según e lider di partido Demokrat, nan programa di gobernashon ta konsentrá riba e asuntunan sosial, pero ta enfatisá ku mester was esaki integral ku otro puntonan di atenshon manera ekonomia i kriminalidat. “Serka nos, e desaroyo di e mucha ta para sentral”, Scheperboer-Parris a splika.
Spesífikamente partido Demokrat ke introdusí leinan di paternidat, paso nan ta di opinion tur mucha tin derecho di sa ken su tata ta. Tambe Scheperboer-Parris ke modernisá edukashon dor di hasí esaki bilingüe, esta na papiamentu i inglés, pa asina e mucha por siña razona i pensa mas mihó. Tambe partido Demokrat ke invertí den e sentro di bario, pa asina esaki bira e punto fokal di kada bisindario.
Resolvé krímennan
Scheperboer-Parris tambe a ekspresá su preokupashon pa e maneho di orden públiko i ke adresa e komportashon kriminal, na lugá di otorga kastigu so. “Nos ke introdusí un banko di ADN kaminda residivistanan ta keda registra i asina hustisia por resolvé krímennan mas lihé”, ela splika. Finalmente e lider polítiko di partido Demokrat ke pa Punda biba atrobe pa asina tin mas atrakshon pa turista manera aktividatnan kultural i teatral.
Outor Deya Mensche