E klup nokturno ta será e simannan benidero – potrèt: The Alley
WILLEMSTAD – Kámara di vigilansia p’ aden i rondó di e klup, seguridat na porta i p’aden i konsulta regular ku polis: e doño di e klup The Alley, Michael Cijntje, a hasi – segun e ta bisa – tur kos pa evitá insidente. Tòg a logra kontrabandiá un arma di kandela siman pasá i a tira dos hoben adulto mata den e establesimentu.
Ta bisa ku ta trata di un pleitu ku a sali for di man alkansando un di e víktimanan pa ekibokashon i e otro intenshonalmente. Segun Cijntje, e arma a drenta despues ku a kumpra un wachimèn. “Tur kos tabata organisá di adelantá. Nan ker a laga tur hende mira ku por a tira e mucha hòmber ei mata gewon asina.”
Nunka promé
Cijntje tin 26 aña den horeca i nunka promé el a eksperiensiá algu asina. “Komo empresario bo ta hasi esfuerso pa evitá algu asina, pasobra e por nifiká bo ruina. Bo ke hasi tur kos pa garantisá seguridat, pero niun hende por ku gèng-, likidashon- i tiroteonan organisá. Esaki por a sosodé na kualke otro sitio.”
Downtown Management Organization tin años ta bringa pa un sentro di siudat bibu i sigur. “Si, a tira dos hende mata den Punda, pero ta kuantu biaha esaki ta sosodé? Ya pa hopi aña Punda ta birando mas i mas sigur i klaro ku esaki ta teribel, pero kon bo ta evitá algu asina?”
Sin miedu
E tiroteo akí no ta e úniko insidente ku a sakudí e islanan. Dos siman pasá a tira un agente polisial mata na Boneiru durante un persekushon i Ministerio Públiko ta konfirmá ku e suministro di armanan ilegal ta siguiendo sin mengua.
Tòg agente polisial Tico Ruiter di e kuerpo polisial di Kòrsou (KPC) no ta kere ku ta birando mas peligroso riba e islanan. “Semper tin kos ta sosodé, pero awor e ta bini mas den medionan sosial. Tur hende ta papia riba esakinan. P’esei nos ta mas konsiente di e pelígernan i di kon fásil ta bira kue un arma.”
Ruiter ta konta ku semper su tim ta bai prepará na un sitio di krímen i ku di antemano ta hasi un análisis di riesgu. “Nos sa ku tin arma den sirkulashon i naturalmente algu por bai robes: un kímiko tambe konosé e riesgunan di e profeshon, pero ami no tin miedu. Mi pareha sí ta suspirá, por sierto, ora mi kana drenta na porta atrobe anochi.”
Plan di akshon
Dos aña pasá a kuminsá ku e proyekto ‘Ta Basta Awor’ pa detektá armanan ilegal i pa baha nan kantidat. Entretantu a finalisá esaki i ni na Ministerio Públiko ni serka polis no tin plannan pa un proyekto por estilo. “Ta nèt un siman a pasa, pues na e momentunan akí nos no ta tratando ku proyektonan manera esun ‘Ta Basta Awor’”, bosero di polis Imro Zwerver ta bisa. “Pero mi no ta ekskluí ku lo bini ku akshonnan.”
E siman akí, Ministerio Públiko a presentá su vishon riba kombatimentu di kriminalidat pa e añanan benidero. Ounke Ministerio Públiko tin solamente e tarea pa pèrsiguí, e ta indiká di ke ta mas enbolbí den henter e kombatimentu: “Ministerio Públiko ke ta un partner den seguridat ku ta aksesibel i ku ta un partner di balor igual ku ta buska e konsulta i e kolaborashon ku partidonan relevante.”
The Alley será
Doño Cijntje di The Alley ke laga tur kos sak un ratu promé i a sera su klup por lo pronto. “Mi mester pensa riba un ke otro i wak despues kon mi ta sigui”, e ta bisa afektá.
Outor Elisa Koek