Líder di partido Zita Jesus-Leito – potrèt: PAR
WILLEMSTAD – A lanta Partido Antia Restrukturá, PAR, na 1993 despues di e referèndùm den kua un mayoria di e poblashon a vota pa mantenshon i restrukturashon di Antia Hulandes. Komo ku, segun diferente grupo, gobièrnu no ker a traha pa e meta ei, nan a lanta PAR. Un aña despues e líder, Miguel Pourier, tabata premier di Kòrsou.
Elekshonnan 2016, Ret Karibense ta presentá e partidonan: Parti 9 PAR
E idea básiko di e partido hel i liberal – pa kua awendia PAR ta para pa Partido Alternativa Real – ta parse di a keda meskos, estando den 2016. E líder aktual Zita Jesus-Leito ta enfatisá ku PAR ta haña e lasonan ku Hulanda hopi importante.
Sinku pilar
Komo sinku pilar PAR ta menshoná: enseñansa, empleo, bon gobernashon, salubridat-naturalesa-medio ambiente i e kalidat i seguridat di bida. Pa loke ta enseñansa, PAR ke solushoná e kuestion di drop-outs. “Mester tin mas atenshon pa enseñansa tékniko pa nos no tin ku buska tantu konosementu for di eksterior i pa por tin mas eskoho de enseñansa”, Jesus-Leito ta bisa.
Un otro punto ta e uso di e oranan di tra’i mèrdia. “Mester dedika tempu na deporte i kultura, den e oranan ei; nos ta haña ku esei ta sosodé muchu tiki awor.”
Empleo i seguridat
“Hende mester traha òf, kisas mihó ainda, bai skol”, e líder di partido ta sigui. “Ora esaki logra, lo tin menos drop-outs i asina tambe menos kriminalidat.”
PAR ke pa instanshanan soshal komuniká mihó ku otro pa asina por monitoreá hendenan sin trabou òf e drop-outs, por ehèmpel. “Di e manera ei lo por guia nan mihó i lo por drenta un trayekto di traha-siña ku nan.”
Salubridat
Den salubridat, prevenshon ta sentral. Mester kombatí malesanan konosí manera preshon haltu i diabetes i e listanan di espera serka speshalistanan mester bira mas kòrtiku. E refineria por keda, pa PAR su parti, pero e mester bai funshoná mas salú si. E partido tin preferensha pa kimamentu di gas.
Sushi lòs riba e isla tambe ta riba agènda di PAR. “Nos ke empleá hende pa prosesá sushi ku ta bula lòs riba e isla. Esakinan ta trabounan ideal p’ esnan menos studiá ku lo por sigui krese. Pa medio di formashon interno un hende por subi den su karera, loke ta hasi e trabou mas atraktivo i ta solushoná e problema di sushi lòs.”
Unio Europeo
PAR ke mehorá e lasonan ku Hulanda. Segun Jesus-Leito nan tabatin un bon kontakto ku Hulanda semper. “Nos ta forma parti di e Reino i nos lo por drecha e lasonan ku Union Europeo via di Hulanda. Nos mester probechá esaki.”
Komo último punto, PAR ta pone énfasis riba gobernashon bon i íntegro. “Despues di años d turbulensha, nos ta kere ku Kòrsou ta kla pa stabilidat i trankilidat. Stabilidat ta sòru pa konfiansa den e ekonomia i invershonistanan lo sinti esei.”
Outor Elisa Koek