WILLEMSTAD – Den oranan di awe mèrdia outoridatnan polisial mester a akudí na Nieuwe Haven na altura di SSK pa evitá ku wèlgistanan ta blòkia e karetera prinsipal aki. Esaki no opstante ku minister di hustisia Nelson Navarro a prolongá e dekreto ku ta prohibí aglomerashon di hende i blòkiamentu di kaya públiko. Na yegada di polis ya tabatin vários opheto poné riba kaya manera piedranan i palunan ku e meta pa blòkia e kaya aki por kompletu.
Mesora e polisnan mes a kuminsá kita e ophetonan aki for di riba kaya pa evitá un káos den e tráfiko di mèrdia. Den presensia di polis a tira vários dònderbos riba kaya i polisnan a haña nan mes ta atendé ku e welgistanan ku tabata aglomerá n’e momentu ei riba tereno di SSK.
Lùmpsùm
Tur esaki a sosodé na momentu ku 12’or a bati i e wèlgistanan no a tende nada di e reunion ku a kuminsá for di 10’or di mainta entre e asosashon di kontratistanan AAV i ministernan Nelson Navarro di Hustisia i Ruthmilda Larmonie-Cecilia di Labor. Den e reunion aki aki lo mester a buska un solushon pa e lùmpsùm di tres mil florin ku e trahadónan ta eksigí i riba kua te ainda no tin klaridat ta for di unda e sèn akí tin ku sali.
E kontratistanan a duna di konosé ku nan ta dispuesto na paga te ku sinku shen florin. Siman pasá sindikato SGTK a purba di haña e sobra 2500 florin for di kompanianan anónimo di gobièrnu pero gobièrnu a rechasá e petishon aki pa motibu ku esaki ta kontra di e lei di bon gobernashon.
Reunion ku Navarro
Tabata alrededor di mitar di unu di mèrdia ora ku presidente di SGTK, Alcides Cova, a haña un yamada di minister Nelson Navarro invitando e sindikato pa un reunion 3’or di atardi pa papia tokante resultado di e reunion. E sindikato a aseptá e invitashon i a forma un komishon di sinku persona konsistiendo entre otro di e sindikalista veterano Errol Cova pa bai papia ku Navarro.
Di un forma bastante trankil i sin hasi muchu pregunta e trahadónan presente a bai di akuerdo pa sinta warda na SSK en espera di resultado di e reunion ku minister Nelson Navarro. “Nos no ta bai negoshá nada pero simplemente nos ta bai tende ta kiko Navarro tin pa bisa nos”. Asina Cova a garantisá e trahadónan ku tabata presente na SSK for di mainta tempran pendiente pa haña un solushon pa nan situashon laboral.
Outor José Manuel Dias