WILLEMSTAD – Despues ku e negosiashonnan entre e asosashon di kontratistanan AAV i ministernan Nelson Navarro i Ruthmilda Larmonie-Cecilia no a resultá den un solushon pa e trahadónan di kontratistanan, e sentralnan sindikal SSK i CGTC konhuntamente ku e sindikatonan no afiliá a anunsiá un wèlga general.
“Mañan mainta 10’or e sindikatonan ta bini huntu na SSK pa kuminsá prepará i mobilisá pa un paro general”. Asina bosero di e sindikatonan Errol Cova a duna di konosé.
Algu despues di e anunsio aki e edifisio di Sentro Pro Arte ku ta keda dilanti di e edifisio di SSK a pega na kandela. No ta konosí si e kandela aki tabata intenshonal i si esaki tin relashon ku e wèlga general ku a keda konvoka. Mas despues un edifisio di un kontratista tambe a pega na kandela.
Den oranan di atardi tres miembro di CGTK ku a forma parti di e delegashon ku a bai papia ku minister Nelson Navarro a ekspresá nan disgustu pa ku e aktitut di e doñonan di kontratistanan.
Outor José Manuel Dias