Un reportahe di José Manuel Dias
WILLEMSTAD – Dieshete sindikato a firma un karta pa gobernadó Lucille George-Wout awe mainta, den kua nan ta pidi oudiensia serka e hefe di estado. E motibu ta, ku e Ordenansa di Lei pa entidatnan ligá na gobièrnu – ku Parlamento a aprobá riba 17 di ougùstùs último – ta limitá negosiashon liber pa kontraktnan kolektivo (‘cao’) pa nv-nan di gobièrnu, segun e sindikatonan. Den e Ordenansa tin stipulashonnan pa gastunan di personal na entidatnan ligá ku gobièrnu.
“Ta un metementu den negosiashonnan liber i esei ta inakseptabel pa nos”, e bosero di e sindikatonan, Errol Cova, ta bisa. “E lei akí ta stroba e sindikatonan pa fiha un posishon hurídiko ku ta otro for di esun di gobièrnu. Esei ta nifiká ku negosiashon no tin sentido mas, pasobra na final ta gobièrnu ta disidí.”
Segun e lider sindikal e Ordenansa ta violá tratadonan internashonal, pasobra e derechi riba negosiashon liber ta algu ku ‘sindikalismo a logra despues di hopi lucha’.
Ta bini aserka, segun Cova, ku e Hunta di Konseho ta kritiká e echo ku no a trata e Ordenansa den e Konseho Sosial-Ekonómiko (‘SER’). Den e órgano di konsulta akí ta tene diskushon tripartit riba proposishonnan di lei, pa despues duna konseho riba nan.
Den e karta e sindikatonan ta pidi un enkuentro ku gobernadó promé ku e firma e desishon di Parlamento i konvertié den lei vigente.
Outor José Manuel Dias