Mike Willem, presidente di AAV – potrèt: Dick Drayer
WILLEMSTAD – “Nunka a hasi palabrashon tokante kompensashon despues di vensementu den 2012 di e cao pa trahadónan di kontratista na Isla. Pues, ku nan ke 3000 florin un biaha so pa kompensashon di e periodo sin cao no ta asina lógiko manera nan ta pretendé. Nos ke kontra nan na kaminda, pero mas ku 500 florin no no por paga.” Asina Mike Willem, e presidente di e asosiashon di kontratista AAV, ta bisa.
Willem ta konta ku a kumbiní un cao pa 2017 i 2018 ku e sindikato SGTK. A tuma e partidonan tres aña pa logra esaki.
PdVSA
E asosiashon di kontratista a laga PdVSA tira bista durante e negosiashonnan pa e kòntrakt kolektivo. “Esei mester si, pasobra si nan no ke paga mas, kos ta para. Al fin al kabo nan ta paga mi miembronan pa enkargo duná.”
Djamars mèrdia un delegashon di e kontratistanan a sinta atrobe na mesa ku Isla pa mira si tin espasio. “Pero tur kos ta duru-duru pegá. No tin avanse: nos tin seis reunion kaba ta bira rondó di e papa kayente”, por komprondé di Willem.
Mantenshon
Konsekuensha ta ku e kompanianan miembro di AAV ta paralisá i e mantenshon di e refineria tambe. “Ku e par di hendenan ku nan tin, no por hasi mantenshon.” E wèlga di e trahadónan, ku ta laborá via kontratista riba tereno di Isla, ta drentando su di tres siman.
Tin kontratista den problema pasobra e dianan akí mester paga impuesto i primanan, pero no tin niun sèn drentando.
Outor Dick Drayer