Injerreau Navarro – potrèt: Dick Drayer
WILLEMSTAD – Injerreau Navarro (29) ta pará ku su trùk pegá ku e stènt for di kua Omayra Leeflang ta hasi kampaña pa Un Kòrsou Hustu. E ta bende Slush Puppies: un meskla kongelá di awa ku stropi na diferente sabor.
Elekshonnan 2016, Ret Karibense ta presentá e partidonan: Parti 10 Un Kòrsou Hustu
Navarro a bini den kontakto ku e partido di Leeflang pasobra su mama tin un subrino ku ta riba e lista. “Pero loke mas ta atraé ‘mi, ta e echo ku Omayra ta sali na defensa di e grandinan ku no tin bos.” Ku e mes ta hoben, no ta importá p’e. “Mi mama ta un penshonado i mi tata tambe: kada hoben tin un mayor. Si kos ta bai bon ku mi famia – ku mi mama i ku mi tata – kos ta bai bon ku ‘mi tambe.”
Emprendedor
Dos aña pasá Navarro a regresá for di Hulanda i a bai traha na Curaçaose Wegenbouwmaatschappij (CWM). “Pero mi ta emprendedor i m’a mira ku no tabata bende Slush Puppies riba e isla. Un buraku den merkado. Mi a bestèl e mashinnan. Despues mi a kumpra e ko’i kareda i mi ta pasa kaminda tin evenementu, manera awe riba Dia di Tera Kòrá.
“Na Hulanda el a studia na e skol pa formashon profeshonal, na nivel di MBO, Hout en Meubilering. Despues el a bai Leiden, pa sigui e estudio pa bira tékniko di laboratorio. “Pero Kòrsou tabata trèk ‘mi, mi tabata sinti falta di mi famia i mi ker a hasi algu bèk pa e isla.”
Awendia Navarro ta traha komo tékniko di laboratorio den e sentral pa asfalt di CWM na Malpais i e ta bishitá eventonan ku su trùk ‘pa gana algu èkstra.’
Íntegro
Navarro a spanta, dia el a bin biba atrobe riba e isla. “Keda sin hasi kos i hañamentu di kos na un forma deshonesto a bira un poko normal aki. M’a spanta di esei.”
Navarro ta haña e eskoho pa e partido di Leeflang unu lógiko. “Omayra a demonstrá den pasado di ta íntegro. Te kaminda ku mi por mira, ta hende íntegro so tin tambe, riba e lista di Un Kòrsou Hustu.”
“Si bo ke goberna bo isla i mester tuma desishon, integridat ta importante. Sinó lo bo pèrdè tur bo sèn den un fregá di wowo i lo bo krea desempleo, pobresa i mas kriminalidat.”
Outor Dick Drayer