Sindikatonan anunsiando welga general – potrèt: José Manuel Dias
WILLEMSTAD – E paro general ku e sentralnan sindikal SSK i CGTC a konvoka pa djaweps mainta a lanta hopi pregunta serka polítikonan. Miéntras ku oposishon ta kritiká e manera kon gobièrnu ta atendiendo ku e konflikto, partidonan di koalishon ta kuestioná e echo ku sindikatonan ta usa e lei di optimalisashon di entidatnan liá na gobièrnu komo un di motibunan di e wèlga general.
“Mi a keda hopi sorprendé di mira kon nèt awor ku ta yegando na un solushon pa e konflikto, lidernan sindikal ta bin basha gasolin riba e problema”. Sindikatonan no mester bini ku argumentu falsu pa hustifiká un paro general”. Asina Alex Rosaria lider polítiko di partido PAIS a reakshoná riba e alegashonnan di e sindikatonan ku ta bisa ku e lei en kuestion ta limitá negosiashonnan liber di cao.
Mas kòntròl finansiero
Segun Rosaria e lei aki no tin nada di haber ku cao. E ta simplemente un lei pa trese mas efisiensia i mas kontròl finansiero den kompanianan i fundashonnan di gobièrnu. Lider polítiko di PAR Zita Jesus-Leitu ta lamentá ku ta dekretá un paro general sin un motibu bálido i pió ainda ku ta usa un lei asina komo argumentu. “Ami no ta mira ku e lei aki ta bai stroba ningun sindikato den futuro. Ku un simpel splikashon di e lei e sindikatonan por a saka afó ku esaki no por ta motibu pa un paro general”, Jesus-Leitu ta remarká.
Na opinion di Hensley Koeiman lider politiko di partido MAN si e sindikatonan ta haña ku e lei di optimalisashon di entidatnan liá na gobièrnu ta kontra di tratadonan internashonal i ta stroba negosiashonnan di cao anto nan mester pidi pa adaptá e lei pero no bai konvoka un wèlga general.
Lei ku medida skondí
Kontrali na e otro partidonan dia ku a trata e lei aki den aki den komishon sentral di parlamentu di Kòrsou frakshon di MFK a rechasá e lei aki. “Nos a bari e lei aki for di riba mesa pasobra e ta faya ku masha hopi tratado internashonal. E ta un lei ku medidanan skondí den dje”. Asina Gerrit Schotte lider polítiko di MFK a duna di konosé.
Solushon diplomátiko
Lider polítiko di partido MFK Gerrit Schotte ta lamentá ku gobièrnu no a sa di eksplorá tur e posibilidatnan pa yega na un solushon pa e impase ku surgi entre SGTK, asosashon di kontratistanan AAV i refineria Isla. “Si mi tabata gobernante e wèlga di e trahadónan di kontratista lo no a dura mas ku dos dia. Lo mi a hasi uso di tur rekurso diplomátiko pa papia ku presidente venezolano i buska un solushon”. Asina Schotte a deklará.
Segun Schottte gobièrnu mester konvensé PDVSA pa eliminá e diskrepansia den pago ku ta eksistí entre e trahadónan ku ta traha pa kontratistanan i esnan ku ta traha den servisio fiho di refineria Isla. Komo solushon pa e lumpsum di tres mil florin ku e trahadónan ta eksigí Schotte ta proponé pa gobièrnu prefinansiá esaki i laga PDVSA firma un karta di garantia den kual e ta komprometé di paga esaki bek ku por ehèmpel krudo òf otro produkto derivá.
Outor José Manuel Dias