WILLEMSTAD – “Ainda no tin un solushon pa e trahadónan di kontratista ku ya tin dos siman i dos dia den wèlga. Despues di a hasi un análisis profundo di e situashon nos a yega n’e desishon pa proklamá un pargo general pa djaweps mainta”. Asina Errol Cova, bosero di e sentralnan sindikal SSK i CGTC i di sindikatonan no afiliá a informá durante di un konferensha di prensa.
Segun Cova e sindikatonan no solamente ke pone preshon pa haña un solushon pa e situashon di e trahadónan di kontratista ku proklamashon di e wèlga general, pero tambe ke mustra nan rechaso di un lei ku Parlamento a aprobá i ku segun e sindikatonan ta ‘limitá liber negosiashon di kontratonan kolektivo den kompania- i fundashonnan di gobièrnu’.
Ta trata akí di e ‘Landsverordening optimalisering overheidsgelieerde entiteiten’ ku parlamentu di Kòrsou a aprobá dia 17 di ougùstùs último i ku ainda mester bai gobernador pa e lei aki por keda publiká. Awe mainta Cova a entregá un karta na gobernador Lucille George-Wout, den kua ta pidi gobernador pa no firma e lei akí.
Outor José Manuel Dias