Algun wèlgista di sindikato BTG (Bònt di Trahadornan di Gobièrnu) na Marie Pampoen - potrèt: Leoni Leidel-Schenk

Algun wèlgista di sindikato BTG (Bònt di Trahadornan di Gobièrnu) na Marie Pampoen – potrèt: Leoni Leidel-Schenk

WILLEMSTAD – A firma e akuerdo ku kua a tèrminá e wèlga general djaweps anochi. Mañan ta stòrt e 1.8 mion florin ku mester pa por paga e lùmpsùm di 3000 florin pa persona, riba kuenta di e wèlgistanan di Isla via nan abogado. A posponé e introdukshon di e Ordenansa Optimalisashon Entidatnan Ligá na Gobièrnu i a kanselá e dekreto di minister di Hustisia Nelson Navarro tokante mantenshon di òrdu públiko. Esei fasilitadó Stanley Betrian a bisa.

E bosero di e 23 sindikatonan den akshon, Errol Cova, a anunsiá ku, ku esei, e wèlga general a yega su fin ku karakter imediato. Djis despues di esei diferente bario tabatin koriente atrobe. For di mainta tempran un gran parti di e isla tabata sin koriente pasobra trahadónan di e kompania di utilidat Aqualectra a uni nan mes na e wèlga.

Lùmpsùm
E wèlga a kuminsá ku trahadónan den servisio di kontratista riba terenonan di Refineria Isla i di Curaçao Oil Terminal. E wèlgistanan tabata eksiguí un kontrakt kolektivo (cao) nobo ku oumento di salario i un lùmpsùm di 3000 florin pa persona pa e añanan ku no tabatin un cao. E kontratistanan a para ariba ku ta 500 florin so nan lo por a paga pa persona. E negosiashonnan entre sindikato SGTK i e asosiashon di kontratista AAV a pega riba e pago di e 2500 florin restante.

Komo ku tin biaha e akshonnan di wèlga tabata akompañá pa violensia, Navarro a instituí un dekreto konteniendo, entre otro, un prohibishon pa aglomerashon i un prohibishon pa blòkia vianan públiko.

Ordenansa
E wèlga a drenta su di tres siman e siman akí i djamars diesshete sindikato a uni nan mes den un karta pa gobernadó Lucille George-Wout. Den e karta e sindikatonan tababta kritiká e Ordenansa ya menshoná, den kua tin, entre otro, stipulashonnan pa kontené gastunan di personal. Segun Cova esaki ta stroba negosiashon liber di cao. Parlamento a aprobá e proposishon pa e lei akí riba 17 di ougùstùs último pero e no a drenta na vigor ainda i, pa motibu di e wèlga, ta asta posponé.

Asina ei e wèlga no tabata solamente pa asuntu di negosiashon di cao di trahadó di kontratista, sino ku el a regardá tur sindikato. Djis despues nan a anunsiá un wèlga general. Preventivamente a tene skolnan será, despues ku minister di enseñansa Irene Dick a saka un partisipashon djarason anochi lat.

Huisio sumario
E baimentu di korienta a pone ku hopi establesimentu a keda será i hopi trahado no por a traha na ofisina. AAV a purba ku un huisio sumario kontra SGTK pa obligá nan miembronan pa bai traha atrobe, pero wes a rechasá e petishon ei. Awor AAV mester paga e gastunan di korte.

Aqualectra tambe a hiba e sindikatonan STKO, SEU i STK dilanti, pero no muchu despues a kuminsá tende zonidonan di ku un akuerdo tabata yegando mas i mas serka. 9’ or di anochi a firma e akuerdo. E veredikto di e huisio sumario a kai despues; e sindikatonan a kumbiní pa hasi un yamada e mes anochi na nan miembronan pa reanudá trabou. Tambe a palabrá ku kada partido ta karga su mes gastunan di korte.

Outor Leoni Leidel-Schenk