Trahadónan wèlgando na Marie Pampoen – potrèt: Leoni Leidel-Schenk
WILLEMSTAD – “Normalmente nos mester di 120 megawatt di koriente mei-mei di un dia den sèptèmber. Pero awe, aworakí, nos tin solamente 40 megawatt pa suministrá”, bosero Sharo Bikker di Aqualectra ta bisa. Komo ku e personal di e kompania di utilidat no a aparesé awe mainta 7’ or na trabou, koriente a bai na mayoria lugá na Bándariba. For di 12’or di mèrdia, ora a kuminsá hasi hopi kalor, esaki a konta pa Bándabou tambe.
Tin mas o menos shen hende trahando. Ta laga nan mantené e mashin na Mundu Nobo operashonal. Por lo demas ta Refineria Isla i bientu mester sòru pa nos mantené 30 megawatt. Hopi trahadó di Aqualectra ta partisipá awe na e wèlga general di e sindikatonan.
“Ta pió so e situashon por bira si no solushoná esaki”, Bikker ta indiká. “E bientu ta minimal i e kolaboradónan ku ta trahando no por keda 24 ora riba dje.” Tin kas kaminda entretantu no tin awa tampoko. Segun Bikker esaki ta pasobra e pòmp di awa a kai afó, pa falta di koriente. Esunnan ku no ta dependé di pòmp, no tin ku wòri, ainda.
Awa
“Nos tanki di awa ta bon yená. Nos tin awa pa sigur tres, kuater dia”, Bikker ta kontinuá. E ta enfatisá ku e situashon ta asina impredisibel, ku e no ta eksluí sabotahe. “Bo no sa kiko hende ta kapas di hasi. Pa nos tambe e situashon akí ta alarmante. Nos ta ku man na kabes.”
Outor Elisa Koek