Enkuentro na sede di Kòrsou di Nos Tur – potrèt: José Manuel Dias
WILLEMSTAD – “Mi a disidí di sostené Kòrsou di Nos Tur pasobra e ta un partido nobo i mi tin un bon sentimentu ku nan lo bai drecha Kòrsou”. Esaki ta palabranan di Sandra ku a asistí na e reunion di tur djarason anochi na sede di e partido ku ta keda den 77 shopping mall. E kantidat haltu di dropout , e kriminalidat kresiente i e kosto di bida ku ta sigui subi ta algun di e puntonan ku Sandra ke pa e partido di Amparo dos Santos resolvé.
Elekshonnan 2016, Ret Karibense ta presentá e partidonan: Parti 11 Kòrsou di Nos Tur
E promesa ku lo baha e edat di penshun na sesenta aña i lo oumentá e penshun di behes na mil florin pa luna ta loke mas ta interesá Frensel n’e momentu aki. “Warda te ora mi tin sesentisinku aña di edat ta hopi leu p’ami”, Frensel ta remarká.
Konfiansa
“Amparo ta ponemi kòrda difuntu George Hueck. Si e bisabo ku bo ta haña e stul aki, bo por konta ku bo ta hañ’é. Esaki ta lokual André ta atmirá den Amparo dos Santos i p’esei mes e ta konfia den tur lokual dos Santos ta bisa di bai hasi. Elvis a disidí di duna e partido aki su konfiansa pasobra e ta kere den e kousa ku Amparo ta luchando pe. “Nos no por sigui den un situashon den kual e riku ta bira mas riku anto e pober ta birando mas pober tur dia”, Elvis ta señalá.
Hóben sin trabou
Pa Aldrin di 22 aña di edat e úniko kos ku e ta pidi Kòrsou di Nos Tur ta pa e partido aki enfoká riba tur e hóbennan ku ta sin trabou. Aldrin ta konta di propio eksperiensha ku e konosé hopi hóben ku n’e momentu aki ta sintá na kas sin trabou pa motibu ku ora nan bai buska trabou niun hende no ta tuma nan na serio. “Nan ta bisabo yen di palabra bunita ku ta bai yamabo bèk pero despues bo no ta tende nada mas di nan i bo ta keda hopi luna na kas sin un trabou”, Aldrin ta lamentá.
Manuel konosé Amparo dos Santos for di Curacao Port Authority (CPA)i ta rekonosé den dje e balor humano di ke yuda esnan den mas nesesidat. “Komo presidente komisario di CPA Amparo a kontribuí enormemente pa trese mas barku krusero pa Kòrsou i asina oumentá nos turismo”, Manuel ta resaltá.
Outor José Manuel Dias