Habitantenan den bario no sa nada di e kampo di akohida – potrèt: Sharina Henriquez
ORANJESTAD – Gobièrnu arubano ke konstruí un kampo di akohida pa refugiado venesolano riba un vèlt anterior di beisbòl na Dakota. Habitantenan den bario no sa di nada. Ademas ainda ta usa e vèlt pa trein hubentut lokal pa hunga beisbòl.
Un karta a lèk djaweps den medionan di komunikashon arubano, kaminda tin pará ku e Ofisina di kombatimentu di desaster huntu ku otro servisionan a disidí pa usa e vèlt pa maksimalmente 500 refugiado. Nan por keda ei pa seis luna i kaba lo disidí nan státùs definitivo. Pero ora e refugiadonan yega tera, promé nan ta bai e fasilidat di deporte Betico Croes na Santa Cruz, kaminda nan por keda 72 ora. Ta ei ta e punto di notifikashon ofishal pa e refugiadonan.
Den e karta tin pará tambe ku un di tres partido a hasi un petishon pa usa e vèlt aki pa otro meta. Pero e konseho na minister ta pa por lo pronto no otorgá e petishon aki te ora ku e ‘krísis i nesesidat di un akohida di refugiado a kita fo’i man’. Parse e di tres partido ta trata di un grupo ku ta empeñá pa beisbòl hubenil.
Manera Karel ‘Cai Cai’Williams. El a nase i lanta den e bario e ta un bèrdadero ‘Dakotero’. “E vèlt aki ta den mi kurason for di dia ku a trah’é na añanan setenta. Semper tabata un lugá kaminda nos por a hunga beisbòl ora di trein mucha.”
Treiner di beisbòl Cai Cai Willems no ta kontentu ku e plan di gobièrnu – potrèt: Sharina Henriquez
Masha tempu e tereno a dekaí, e hòkinan pa kambia paña ta ruina meskos ku e tribunanan. “Nos tin mas ku 15 aña kaba ta trata di haña gerensia di e lugá. Te dia djawe nan ta manda nos djaki paya. Nos a aserká hopi hende: parlamentario, minister. Ma niun no ta tende nos.”
Dakota di semper ta un bario di problema sosial. Willems ta bisa ku e vèlt ta nèt nan ke pone e muchanan riba bon kaminda. “Tur kaminda tin vèlt mas adekuá. Awor nan ta skohe nèt Dakota. Pa awor nos haña yen di strañero den nos bario i Dakota haña un nòmber mas malu atrobe.”
Plan si pero sin plaka
Servisionan di gobièrnu semanalmente ta bini huntu tokante di e asuntu venesolano. Tabata konosí mas largu kaba ku gobièrnu a indiká dos lugá di akohida pa refugiado venesolano. E kompleho di deporte Betico Croes ya pa añanan largu ta un di e lugánan di akohida den kaso di kalamidat. Ta e vèlt di Dakota si ta nobo den e asuntu aki.
Pero for di diferente fuente den gobièrnu ta konta ku nan no ta mira plaka pa ehekutá e plan di refugiado. “Ken ta bai paga e strèchernan i tur loke tin mester di dje. Nada di e asuntunan ei no ta reglá niun ora so. Ta plan nèchi pero riba papel so”, un fuente ku ke keda anónimo ta bisa. Pasobra e plan di e refugiadonan mester keda un sekreto.
Ademas e vèlt di Dakota ta pega na e edifisio di Krus Kòrá. “Nos sa basta tempu kaba ku gobièrnu ker a bai usa e tereno. Si ta konsientemente a skohe esaki mi no sa. Si e venesolanonan bini, nos lo yuda nan komo organisashon di emergensia. Pero nò, ainda nos no tin un kòntrakt ku gobièrnu”, bosero Indra Anthony-Pereira ta bisa.
Senario
Djaweps un patruya di polis tambe ta pasa na e vèlt. “Ta awe numa nos a tende ke men nos ta pasa tira un bista na e sitio. Mas aleu nos no sa nada.” Algun luna pasá polis a laga sa ofisialmente ku nan a adaptá nan senario komo preparashon pa un posibel fluho di refugiado. E polisnan ta bisa ku nan no ta na altura di esaki. “Nò, na trabou tampoko nan no a informá nos.”
Outor Sharina Henriquez